USA-mi tusagasiuutit: Oqallinneq Trumpip Bidenimit nuanarineqarnerulissutiginngikkaa

Oqallinneq torernerusoq, oqallinnermi akornusersuinerit ikinnerusut, Donald Trump aamma Joe Biden oqariartuutai ersarinnerusut. Taamaattorli oqallinnermi immikkuullarissumik pisoqanngilaq, qinersisartut isumaannik allannguisinnaasumik.

Biden aamma Trump præsidentinngorniunnermi oqallinnerat Amerikami tusagassiuutit arlallit taama naliliipput.

Oqallinneq kingullermi oqallinnermut naleqqiutissagaanni oqallinneq ataqqinnippalaarnerusumik ingerlasoq, nutaarsiassaqartitsivimmi Fox Newsimi saqqummiisartoq Howard Kurtz oqarpoq.

- Oqallinneq ajugaasortaqarani naammasivoq, kingullermi Clevelandimi oqallinnermisulli akerleriitsiginnginnerat pitsaaqutaavoq, Kurtz allappoq.

Oqallinnermi Trump Joe Bidenimut peqqarniitsumik pissusilersornera annikinneruvoq oqalinnermut kingullermut sanilliutissagaanni, oqallinneq isumaqatigiiffiuneruvoq, præsidentituli ingerlaqqiinnarnissaminut ersarissumik oqariartuuteqarnani oqallinneq naammassigaa, CNN-imi tusagassiortut allapput.

- Trump oqallinnermi kingullermit eqqissisimaneroqaaq, kisianni salluliorluni inummut saassuseriartarnera maluginiagassaavoq, tusagassiortut naliliipput.

Oqallinnissaannut nutaamik malittarisassaliortoqarnikuuvoq, tassa Donald Trumpip Joe Bidenilluunniit aallarniillutik minutsinik marlunnik oqaaseqartoqarneranni mikrofoonii qaminneqartassasut.