USA-mi præsidentinngorniuttut qinersinnginnermi kingullermik oqallissasut

USA-mi præsidentip Donald Trumpip taassumalu unammillertaata demokratineersup Joe Bidenip præsidentinngorniunnissamut oqallinerat kingulleq nunatsinni nalunaaqutaq malillugu unnugu aqqanermut aallakaatinneqassaaq.

USA-mi sapaatit akunneri marluk qaangiuppta novemberip ulluisa pingajuanni præsidentimut qinersisoqassaaq.

Præsidentinngorniuttut kingullermik septemberip ulluisa 29-anni oqallikkamik imminnut qalleraatiinnavipput.

Taamaammat USA-mi præsidentit oqallitsinneqartarnerannut ataatsimiititaliap unnugu oqallinnissaannut nutaanik malittarisassaliorpoq, tassa Donald Trumpip Joe Bidenilluunniit mikrofoonii aallarniilluni oqaaseqartoqarnerani qaminneqartassallutik.

Nutaarsiassaqartitsivik AP taama allappoq.

AAMMA ATUARUK Præsidentinngorniuttut oqallitsinneqarnerminni mikrofoonii qaminneqartassasut

Malittarisassaat nutaat atuutilersinneqarneranni qinigassanngortittup aappaa sammisamik ataatsimik minutsinni marlunni oqalussinnaatitaassaaq. Oqallineq minutsinik 90-nik sivisussuseqassaaq.

Oqallinneq naalagaaffimmi Tennesseemi illoqarfimmi Nashvillemi pissaaq.

Oqallinneq DR 2-mi aamma TV 2 Newsimi toqqaannartumik aallakaatinneqassaaq.