Trump atuakkiortumut milliardit affaat sinnerlugit taarsiisussanngortinneqartoq

USA-p præsidenterisimasaa Donald Trump, atuakkiortumik E. Jean Carrollimik nikanarsaasimasutut eqqartuunneqarluni 83,3 millionit dollarinik taarsiisussanngortinneqarpoq.

New Yorlimi eqqartuussivimmi aalajangiiniartussat taama aalajangiipput. Nutaarsiassaqartitsivik Reuters taama allaaserisaqarpoq.

83,3 millionit dollarit tassaapput 571 millionit koruunit missaat.

Carroll eqqartuussinermi ilaatigut oqarpoq Trumpip Carroll New Yorkimi atisaarniarfiit ilaanni Bergdorf Goodmanimi atisanik ooqattaarisarfimmi 1990-ikkut qiteqqunneranni pinngitsaalisimagaa maannalu tamanna pillugu eqqartuussivilersuullugu.

Eqqartuussiviup aalajangiinera isumaqatiginngikkaa

Trumpip USA-mi 2019-imi præsidentiunerata nalaani Carrollip Trump pinngitsaaliisimasutut unnerluutigaa. E. Jean Carrollip eqqaamasalersaarutimi tunisaanerunissaa pillugu Trumpip pinngitsaalisimaneranik pasilliutit saqqummiukkai Trumpip oqaatigaa.

Trumpip taama oqarnera Carrollip nikanarsaanertut isigaa.

Eqqartuussiviup aalajangigaa suliareqqitassanngortinniarlugu Trumpip inoqatinut attaveqaqatigiittarfikkut Truth Socialikkut allaaseraa. Præsidentiusimasup inoqatinut attaveqaqatigiittarfik Truth Social pigvaa.

- Tissinaannarporluunniit! Eqqartuussiviup aalajangigaa isumaqatiginngilluinnarpara suliareqqitassanngortinniarparalu, Bidenimmi ilitsersuineratigut taama aalajangiisoqarpoq, uannik republikanerinillu malersuiniarneruvoq, Trump Truth Socialikkut allappoq.

New Yorkimi eqqartuussinermi aalajangiisussat akunnerit pingasut nalilersuereerlutik aalajangiipput.

Eqqartuussivik qimakkaa

Trump E. Jean Carrollimut qanoq annertutigisumik taarsiissanersoq eqqartuussiviup aalajangiivigisassatuaraa, pinngitsaaliisimanersoq pinngitsaaliisimannginnersorluunniit, Trumpiluunniit tamanna pillugu salluliorsimanersoq aalajangiivigisassarinagu.

Trump eqqartuussivimmi suliaq tallimanngornermi suliarineqarnerata nalaani eqqartuussivimmit aniinnarpoq, Carrollimmi eqqartuussissuserisua naggataarutaasumik nassuiaatinneqalermat Trump aniinnarpoq.

Trumpip eqqartuussissuserisua Alina Habbas naggataarutaasumik nassuiaatinneqalermat aatsaat Trump eqqartuussivimmut uteqqippoq.

Siornatigut præsidentiusimasoq atuakkiortumik E. Jean Carrollimik nikanarsaasimasutut eqqartuussinermi siorn maajimi ajorsareerpoq, 5 millionit dollarinik tassani taarsiisussanngortinneqarluni, tassa 34 millionit koruunit missaat.