Trudeaup avatangiisinut illersuisunik naalakkersuisoqalernera uuliasiortunit ernumassutigineqartoq

Canadap ministerunerata Justin Trudeaup, naalakkersuisoqatigilikkamini ministerissani toqqarpai.

Pingaartumik ministerit marluk uissuummisitsipput, Canadamimi uuliasiortitseqatigiinnut ernumasitsipput, avatangiisinillu mianerinnittunut neriuuteqalersitsillutik.

Ritzau taama allaaserisaqarpoq.

Avatangiisit mianerineqarnissaat pillugit siornatigut ilungersuuteqarsimasoq Steven Guilbeault, avatangiisinut silallu pissusianut ministerinngorpoq.

Taassuma saniatigut Jonathan Wilkinson, nukissiuutit ataavartut pillugit suliffeqarfinni ukiuni qulikkaani marlunni sulisimasoq, nunap pisuussutaannut tunngasuni ministerinngorpoq.

Guilbeault-p Wilkinson kingoraassavaa, taannami ukiuni marlunni siornatigut nunap pisuussutaanut tunngasuni ministeriusimagami.

AAMMA ATUARUK Trudeau Canadami qinersereernermi siuttunngoqqittoq

Guilbeault, aviisimit La Pressemit "Montrealip avatangiisit pillugit guutiatut" ateruseqartinneqarnikuuvoq. Taassuma avatangiisit pillugit suliniaqatigiiffinni, soorlu Greenpeacemi, ukiut 20-t sinnerlugit siornatigut sulisimavoq.

Taassuma Canadami avatangiisit pillugit akerliussutsimik takutitsinermi Torontomi CN Tower 2001-mi qaqivaa.

Canada nunarsuarmi uuliasiortuni annerit sisamassaraat, ministerit taakku marluk tamanna pillugu uuliasiortitseqatigiinnut ernumalersitsipput.

- Tamanna nunap pissarititaanit aningaasarsiortunut tamanut ernumanarpoq nikallornarlunilu, Heather Exner-Pirot('pi-ro'), uuliasiortitseqatigiiffiit pisuussutissanillu allanik qalluisut isummersuisianni Macdonald-Laurier-institutimeersoq, oqarpoq.

- Greenpeacemi sulisimasoq pisuussutissanik qalluinermi ineriartortitsinitsinnut maanna sunniuteqalissaaq, taanna oqarpoq.

/ritzau/Reuters