Trudeau Canadami qinersereernermi siuttunngoqqittoq
Canadami ministeriuneq Justin Trudeau, partiialu Liberalit, Canadami inatsisartunut qinersinermi ajugaasussatut isikkoqarput.
TV-qarfiup CBC-p kisitsisaataasa tamanna takutippaa. Nutaarsiasaqartitsivik AFP taama allaaserisaqarpoq.
Trudeaup partiiata Liberalit, partiilu Konservatiivit, Erin O'Toole, siuttoralugu naligiittorujussuunerat kisitsisit siulliit takutikkaluarpaat.
Canadami tv-qarfiup CTV Newsip kisitsisaatai naapertorlugit Liberalit, Justin Trudeau, siuttoralugu ikinnerussuteqarlutik naalakkersuisoqatigiiliorniarput.
Canadami inatsisartuni inissat katillutik 338-upput, amerlanerussuteqarniaraannilu inissanik 170-inik pissarsisariaqarluni.
Konservatiivit qinersinermi ajorsarnertik marlunngornermi ullaakkut nassuerutigaat. Konservativiit siuttuata nutaarsiassaqartitsivimmut Reutersimut oqaatigaa, Justin Trudeau, sianerfigalugu pilluaqqusimallugu.
AAMMA ATUARUK Natan Obed genopstiller til præsidenposten for inuitorganisation
Canadami inatsisartunut qinersiviup qiteqqunnerani qinersisoqarnissaa, Trudeaup aggustimi nalunaarutigaa. Trudeau tapersersorteqangaatsiartoq, inunnik isumasiuinerit taamanikkut takutippaat.
Afghanistanimilu pisut taava sunniuteqarput, Covid-19-ilu Canadami sisamassaa tuniluutipiluulerluni. Qineqqusaarneq taamaasilluni ilimagisamit allaaneruvoq.
Canadamiut aamma isumaqarput inatsisartunut maanaannaq qinersisoqarnissaa pisariaqanngitsoq, Covid-19-illu tuniluunnerata nalaani akisussaqisoq.
Canadami ilanngutassiortorput Marianne Stenbæk taama oqaluttuarpoq.
Konservatiivit siuttortaavata ataatsimut isigalugu taassuma saniatigut ilisimaneqarpallaanngilaq, partiialu inunnik isumiuinerni kinguaqqangaatsiarluni.
Canadamili partiit annerit marluk Liberalit Konservatiivillu sapaatit-akunnerata naanerani naligiinngaatsiarput. Konservatiivit 33 procentinit taaguuneqarnissaat, Trudeaullu partiiata Liberalit 32 procentinit taaguunneqarnissaat, inunnik arfininngormat isumasiuinerit takutippaat.
