Nunanit allanit

Trudeau: Ukrainemiut timmisartuat iranimiunit rakettimik eqqorneqarpoq

Ukrainimiut timmisartuat 176-inik ilaasoqarluni pingasunngornermi nakkartoq Iranimiunit rakettimik eqqorneqarpoq. Canadap ministeriunera, Justin Trudeau, tusagassiortunik sisamanngornermi katersuutitsinermi taama nalunaaruteqarpoq.
Canadami nunanilu allanilu paasiniaasartut tusarliussaat naapertorlugit ukrainemiut timmisartuat ilaatigut canadamiunik 63-inik issimasoqarluni nakkartoq Iranimi rakettimik eqqorneqarsimasoq, Canadap ministeriunerata, Justin Trudeaup, tusagassiortunik sisamanngornerup unnukkuani katersuutsitsinermi oqarpoq. Assi © : Ritzau Scanpix
Allattoq Ritzau
januaarip 10-at 2020 08:02
Nutserisoq Hanne Petersen

- Tusarfinnit assigiinngitsunit tusarliussat naapertorlugit, timmisartoq iranimiunit rakettimik eqqorneqarpoq, Justin Trudeau, Canadami illoqarfiit pingaarnersaanni Ottawami Danmarkip nalunaaqutaa naapertorlugu sisamanngornermi unnukkut taama oqarpoq.

Timmisartorlu kukkusumik eqqorneqarsimasinnaasoq ilanngullugu oqaatigaa.

AAMMA ATUARUK Timmisartoq Teheranimi nakkannginnermini ikuallassimasoq

Timmisartup nakkarnerani ajunaartuni 63-it canadamiuupput.

Paasissutissiinerillu naapertorlugit ukrainemiut timmisartuat nakkartoq iranimiut rakettiannik eqqorneqarsimasoq, tuluit ministeriunerunerata, Boris Johnsonip, sisamanngornermi unnukkut oqaatigaa.

Ukrainemiut timmisartuat nakkartoq iranimiunit saassunneqarsimanera pillugu nalunaarutit pisortatigoortuunngitsut siulliit sisamanngornermi ualikkut saqqummiunneqarput. Amerikami nutaarsiassaqartitsiviit arlallit kinaassutsimik isertuussillutik paasissutissiinerat tunngavigalugit nalunaaruteqartuupput.

Trudeau timmisartup rakettimik eqqorneqarnerasimanera pillugu pisortatigoortumik nalunaaruteqaqqaartuuvoq.

AAMMA ATUARUK Svenskit qulit Iranimi timmisartoq nakkarmat ajunaartut

- Uagutsinnut tusarliussat naapertorlugit timmisartoq nakkartoq rakettimik eqqorneqarsimavoq, tamatumunngali atatillugu annerusumik oqaaseqarusunngilanga, Trudeau oqarpoq.

Timmisartoq Iranimi illoqarfiit pingaarnersaanni, Teheranimi, nakkarmat ajunaartuni 82-it iranimiuupput, 63-it canadamiuupput, aqqanillit ukrainemiuupput, qulit svenskiupput, sisamat afghanistanimiuupput, pingasut tyskiupput pingasullu tuluullutik.

Aamma atuaruk