Svenskit qulit Iranimi timmisartoq nakkarmat ajunaartut

Ukrainimiut timmisartuat Iranimi nakkarmat issimasut tamarmik 176-it ajunaarput, taakkunannga Sverigemiusut innuttaassusillit qulit.
Timmisartoq Iranip illoqarfiisa pingaarnersaata Teheranip timmsiartoqarfianit Imam Khomeinimit qangattarsimatsiaannarluni nakkarpoq, teknikkikkullu ajoquteqarsimanissaa ilimagineqarpoq. Assi © : Ritzau Scanpix
Allattoq Ritzau
januaarip 08-at 2020 07:40

Ukrainep nunanut allanut tunngasunut ministeriata Twitterikkut tamanna allaaseraa.

Iranimiut 82-it, Canadamiut 63-it, Ukrainemiut aqqanillit, Afghanistanimeersut sisamat, Tysklanimeersut Tuluillu Nunaanneersut pingasut aamma ajunaartut, nunanut allanut tunngasunut ministerip Vadym Prystaikop nalunaarutigaa.

Timmisartoq Boeing 737-eq Ukrainemiut timmisartuutileqatigiiffiannit Ukraine International Airlinesimit pigineqarpoq, Ukrainellu illoqarfiisa pingaarnersaannukartilluni nakkarluni.

Ajunaartut kinaassusaannut paasissutissat ungasinngitsukkut saqqummiunneqarumaartut, timmisartuutileqatigiiffiup ullaaq manna nalunaarutigaa.

Peqqarniisaarniartoqarsimannginnera erseqqissaatigineqartoq

Timmisartoq Iranip illoqarfiisa pingaarnersaata Teheranip timmsiartoqarfianit Imam Khomeinimit qangattarsimatsiaannarluni nakkarpoq, teknikkikkullu ajoquteqarsimanissaa ilimagineqarpoq.

Timmisartoq mekanikerinit januaarip ulluisa arfernanni misissorneqarpoq, ajoquteqanngitsutullu tassani nalilerneqarluni.

Timmisartoq Iranip USA-llu akornanni najummassimanartorsiortoqaleruttornerani nakkarpoq, ajutoornerlu tassunga atassuteqanngitsoq Ukrainep oqaatigaa, peqqarniisaarniartoqarsimanngitsorlu, Ukrainep aallartitaqarfiata erseqqissaatigaa.