Timmisartoq Teheranimi nakkannginnermini ikuallassimasoq
Ukrainimiut timmisartuutaat Iranimi Teheranimi pingasunngornermi nakkarpoq, takunnittullu naapertorlugit timmisartoq suli nakkartigani ikuallassimavoq timmisartorlu uteriaraluarsimalluni.
Timmisartoq nakkartoq 176-inik ilaasoqarluni nakkarpoq, ajutoornerlu pillugu misissuinermi siullermi saqqummiunneqartut naapertorlugit Reuters taama allaaserisaqarpoq.
Iranimi oqartussat nalunaarusiaat naapertorlugu ilaatigut nunamit takunnissimasut oqaluttuaraat timmisartoq Boeing 737 silaannarmiitilluni ikuallalersimasoq.
Takunnittut ilagaat timmisartoq alla.
Timmisartoq nakkareersorlu isumaliutigineqaraluarpoq rakettinik eqqorneqarsimasoq tamannali Iranimit akuerineqanngilaq.
AAMMA ATUARUK Svenskit qulit Iranimi timmisartoq nakkarmat ajunaartut
Ukrainemiut timmisartuata Iranimi nakkarnerata kingorna boksit qernertut marluk nassaarineqarsimasut, Iranimiut tv-qarfiata ilisimatitsissutigaa.
Iranip boksit qernertut USA-mut tunniukkumanngilai.
Inuit 176-it ajunaarnerannik kinguneqartumik timmisartup Iranimi nakkarnerata kingorna boksit qernertut marluk - paasissutissanik oqaloqatigiinnernillu ilaatigut immiussisartut timmisartullu nakkarnerannut pissutaasunik paasiniaanermut atorneqartartut - nassaarineqarput.
Iranimiut tv-qarfiat taama ilisimatitsissuteqartoq, nutaarsiassaqartitsiviup Reutersip allaaseraa.
AAMMA ATUARUK Iranip boksit qernertut USA-mut tunniukkumanngikkai
Iranip naalagaaffiani atorfillip oqarnera naapertorlugu boksit qernertut marluk nassaarineqartut aserorsimapput, taakkuali nalunaarsugaat suli misissorneqarsinnaasorineqarlutik.
Timmisartoq Boeingiusoq Iranimi illoqarfiit pingaarnersaanni Teheranimi nakkartoq ukrainemiut timmisartoraat.
Amerikamiulli timmisartulioqatigiiffiata, Boeingip, boksit qernertut marluk nassaarineqartut tigunissai naatsorsuutigissanngilaa. Iranimi nutaarsiassaqartitsiviup Mehrip Iranimi silaannakkut angallannermut oqartussani pisortaq, Ali Abedzadeh, taama oqarsimaneraraa, nutaarsiassaqartitsiviup AFP-ip allaaseraa.