Iranip boksit qernertut USA-mut tunniukkumanngikkai

Inuit 176-it ajunaarnerannik kinguneqartumik timmisartup Iranimi nakkarnerata kingorna boksit qernertut marluk - paasissutissanik oqaloqatigiinnernillu ilaatigut immiussisartut timmisartullu nakkarnerannut pissutaasunik paasiniaanermut atorneqartartut - nassaarineqarput.

Iranimiut tv-qarfiat taama ilisimatitsissuteqartoq, nutaarsiassaqartitsiviup Reutersip allaaseraa.

Iranip naalagaaffiani atorfillip oqarnera naapertorlugu boksit qernertut marluk nassaarineqartut aserorsimapput, taakkuali nalunaarsugaat suli misissorneqarsinnaasorineqarlutik.

Timmisartoq Boeingiusoq Iranimi illoqarfiit pingaarnersaanni Teheranimi nakkartoq ukrainemiut timmisartoraat.

Amerikamiulli timmisartulioqatigiiffiata, Boeingip, boksit qernertut marluk nassaarineqartut tigunissai naatsorsuutigissanngilaa. Iranimi nutaarsiassaqartitsiviup Mehrip Iranimi silaannakkut angallannermut oqartussani pisortaq, Ali Abedzadeh, taama oqarsimaneraraa, nutaarsiassaqartitsiviup AFP-ip allaaseraa.

AAMMA ATUARUK Svenskit qulit Iranimi timmisartoq nakkarmat ajunaartut

- Boksit qernertut marluk nassaarineqartut timmisartulioqatigiiffimmut amerikamiunullu tunniutissanngilagut.

- Boksit qernertut nassaarineqartut nunamut sorlermut misissugassanngortinneqassanersut suli aalajanginngilarput, Ali Abedzadeh oqarpoq.

Silaannakkut angallannermut malittarisassat nunanut tamalaanut atuuttut naapertorlugit nunat timmisartumik nakkarfiusimasut misissuisinnaatitaasartut, Ali Abedzadehip ilanngullugu oqaatigaa.

- Iranimi silaannakkut angallannermut oqartussaasut timmisartoq nakkartoq misissoqqissaassavaat, ukrainemiulli aamma misissueqqissaareqataasinnaapput, Ali Abedzadeh oqarpoq.

Timmisartumi nakkartumi issimasuni arlalippassuit nunanit tamalaaneersuupput.

Timmisartumi nakkartumi issimasuni 82-it iranimiuupput, 63-it canadamiuupput, aqqanillit ukrainimiuupput, qulit svenskiupput, sisamat afghanistanimiuupput, pingasut tyskiupput pingasullu tuluullutik.

Iranimiut Irakimi sakkutooqarfinnut marlunnut saassussineranniit nalunaaquttap akunnialui qaangiummata timmisartoq nakkarpoq. Sakkutooqarfiup saassunneqartup aappaa amerikamiunik danskinillu sakkutooqarpoq.

AAMMA ATUARUK Irakimi sakkutooqarfik Iranimiunit saassunneqartoq

USA-p sapaatip-akunnerani kingullermi tallimanngornernermi saassusinerani Iranimi sakkututuut naalagaanertaata, Qassem Soleimanip, toqutaanerata kingunerisaanik iranimiut akiniaallutik saassussipput.

Timmisartup nakkarnera saassussisoqarneranik pissuteqanngitsoq timmisartulli motooriata ajoquteqarneranik pissuteqartoq, iranimiut saassussinerisa kingunitsiannguagut Ukrainep aallartitaqarfiata Iranimut ilisimatitsissutigaa.

Tamatumali kingorna taamaattoqannginneraavoq. Pisortatigoortumik nalunaaruteqartoqarsimanngitsoq, Ukrainep aallartitaqarfiata erseqqissaatigaa.