Irakimi sakkutooqarfik Iranimiunit saassunneqartoq
Iranip Irakip kippasissortaani sakkutooqarfik Ain Al-Asad raketinik unnuaq saassuppaa. Sakkutuut USA-meersut Danmarkimeersullu sakkutooqarfimmi Ain Al-Asadimi inissinneqarnikuupput.
Iranimi sakkutuut Revolutionsgardemeersut Irakimi sakkutooqarfimmik saassussisuunertik uppernarsarpaat. Nutaarsiassaqartitsivik Reuters taama allaaserisaqarpoq. Sakkutuut naalagaata Qassem Soleimanip sapaatip-akunnerata siuliani toqutaaneranut tamanna akiniaanerusoq nalunaarutigineqarpoq.
Irakip avannarpasissuani sakkutooqarfik Erbilimiittoq raketinit aamma eqqorneqarpoq.
AAMMA ATUARUK Tysklandip Irakimi sakkutuuni angerlartittussanngorai
Sakkutuunik Danmarkimeersunik saassussinermi ajoqusertoqanngitsoq, Danmarkimi illersornissaqarfiup oqaaseqartitaata nutaarsiassaqartitsivimmut ilisimatitsussutigaa.
Raketip siulliup, sakkutooqarfik Ain Al-Asad, Danmarkip nalunaaqutaa naapertorlugu ippassaq unnuakkut nalunaaqutaq ataatsimut qiteqqunnerata missaani eqqorpaa. Illersornissaqarfik taama nalunaaruteqarpoq.
Amerikamiut sakkutuui 80-it saassussinermi toqutaasimasut, Iranip naalagaaffiata tv-qarfiata ullaaq manna nalunaarutigigaa, nutaarsiassaqartitsiviup Reutersip allaaseraa.
Tamannali tusarfinnit allanit suli uppernarsarneqanngilaq, USA-llu præsidentia Donald Trump annerusumik suli qisuarianngilaq:
- Pissutsit ajunngillat. Irakimi sakkutooqarfiit marluk raketinit eqqorneqarput. Ajoqusersimasut aseruatiternerillu nalilersuleruttorpavut, præsidenti Twitterikkut ilaatigut taama allaaserisaqarpoq, annerusumillu kingusinnerukkut nalunaaruteqarnissani nalunaarutigalugu.
AAMMA ATUARUK Stoltenberg Nato-p ataatsimeereernerata kingorna: Aaqqiiagiinngeqatigiinneq sakkukillisariaqarpoq
USA saassussinermut akiniaassanersoq taamaasilluni suli ilisimaneqanngilaq.
Raketit katillugit 15-it Irakimi sakkutooqarfiit marluk taakku eqqoraat, Iranip naalagaaffiata tv-qarfiata ilisimatitsissutigaa.
Amerikamiut akiniaassappata Iranimiut Kangia Qiterlermi eqqorniagassaminnik allanik 100-nik nalunaarsugaqartut, Iranimi sakkutuunit tusarfiit ilaata Iranimi naalagaaffiup tv-qarfianut oqaatigaa.
USA iligisaasalu akiniaanissamut atatillugu saassussiffik Iranimit eqqorneqarumaartoq, Iranip mianersoqqussutigaa.
