Transparency Greenland: Pissaanermik atornerluineq pillugu suliat politikerinut tatiginnilersitsisinnaapput
Sakkortuumik ilungersunartumillu isornartorsiuineq.
Pisortat ingerlatsinerannut tunngasunut profesoori sapaatip akunnerata siuliani taama naliliivoq. Akiuussutissamik kapuisoqarneranut tunngatillugu suliamik eqqartuussissuserisut Kommuneqarfik Sermersuumut tunngatillugu misissuineranni taama isornartorsiuisoqarpoq.
Suliaq borgmesterip, Charlotte Ludvigsenip (IA) atorfillillu pingasut siuleriiaattunik qaangiiginnarlutik juulimi kapitinnerannut tunngavoq.
Eqqartuussissuserisut misissuinerminni "kommunip ingerlatsinermi ileqqorissaarnissaq illukartippaa, tassanilu ileqqussaanngitsumik pissaanermik allannguinissamut inerteqquteqarnermut naapertuutinngitsumik nammineq soqutigisat attuumassuteqanngitsut ilanngutitillugit."
Borgmesterip akiuussutisserneqarneqarnera pillugu suliaq:
- Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
- Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
- Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
- Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
- Borgmesteri, Charlotte Ludvigsen taassumalu atorfilittai pingasut siuleriaattut ullaap tungaani saneqquppaat, taakkulu matukkut allakkut isertinneqarput. Atorfilittat silataani siuleriaattunik nakkutiginninnermi ikiuuttussaapput.
- Akiuussutissalersuinermut ataqatigiissaarisup, Anna Wangenheimip oqarnera naapertorlugu taakku akiuussutisserneqarnissamik piumsaqarput – taamaattoqanngippallu siuleriiaattuni ikiuiniarnatik.
- Kommunip siorasaaruteqartoqarneraanera itigartitsissutigaa – borgmesterillu tamanna ”paatsooqatigiinnerusimassasoq” ilimagalugu.
- Borgmesterip siuleriiaattunik qaangiiginnarluni utaqqisorpassuit allat sioqqullugit akiuussutisserneqarsimanini utoqqatsissutigaa.
- Namminersorlutik oqartussat utoqqatsertoq: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.
Nunatta inuisa 32 procentiisa kommunini politikerit atorfilittallu tatiginngikkaat imaluunniit immannguaannaq tatigigaat, Transparency International Greenland nalunaarusiorneranit qaammatialuit qaangiuttut pisoq tamanna pivoq.
AAMMA ATUARUK Misissuineq nutaaq: Politikerinut tatiginninneq naqqanneqqavoq
Taamaakkaluartoq, Transparency International Greenland allatseqarfiani pisortaq Bodil Karlshøj pisoq politikerinut tatiginninnerulernermik kinguneqarsinnaasoq isumaqarpoq:
- Pisoq una ammaqisumik suliarineqarmat borgmesterilu saqqummilertorluni ajuusaarmat tatiginninnerulersitsisoraara. Pisut qulaarneqaraangamik soqutiginnilersitsisarput, Bodil Karlshøj oqarpoq.
Ammasumik pissuseqarneq tatiginnilersitsisuuvoq
Politikerit atorfilittallu akornanni pissaanermik atornerluineq ukiuni kingullerni takussaanerulersimasoq, Transparency International Greenlandip nalunaarusiaa naapertorlugu nunatta inuisa 60 procentii isumaqarput.
Bodil Karlshøjip isumaa naapertorlugu tamanna naalakkersuinikkut ingerlatsinermi ammasuunerup amigaataaneranik nassuiarneqarsinnaavoq. Misissuinerimmi tamarmik takutippaat, toqqortorluni pigaanni pissaanermik atornerluinissaq peqquserlullunilu iluanaarniarnissaq ajornannginnerusartoq. Taamaammallu tusagassiutit allaaserinnikkaangata politikerillu, soorlu matumani kommunalbestyrelsi suliat ilumoorullugit takutikkaangatigit inuit tatiginnilertarput:
AAMMA ATUARUK Professori: Kommunip akiuussusertinneq pillugu isornartorsiorneqarnera sakkortullunilu ilungersunarpoq
- Pissutsit ilaat pissaanermik atornerluinertut misigineqartarput, naak taamaanngikkaluarlutik. Tamannalumi nalusarparput, taamaammat pissaanermik atornerluinerunerarlugit oqallittoqalertarpoq. Taama pisoqarpat politikerit sassarlutik qanoq pisoqarsimanera ammasumik oqaluttuarigunikku aatsaat anigorsinnaavaat.
Aqutsineq pillugu Københavnip Universitetiani professori, Michael Gøtze KNR-imut oqaqqammerpoq Charlotte Ludvigsenip atorfillillu pingasut iliuuserisimasat pissaanermik allannguinerusoq ilungersunartoq, nammineq kukkuluttorujussuartut isigisani.
