Toqutsisimasumik suliami Nunatta Eqqartuussisuuneqarfia angummut 27-nik ukiulimmut eqqartuussummik aalajangersaasoq
Angut maanna 27-nik ukiulik Sisimiuni arnamut 56-inik ukiulimmut toqutsisimasutut timimullu assuarnartuliorsimasutut apriilimi eqqartuunneqarpoq. Eqqartuussap eqqartuunneqarnini taamani ingerlaannaq suliassanngorteqqippaa, eqqartuussutaali Nunatta Eqqartuussisuuneqarfiani maanna aalajangersarneqarpoq.
Politiit tusagassiorfinnut nalunaarummi taama nalunaarput.
Nunatta Eqqartuussisuuneqarfiani eqqartuussinermi pisuutitsisoqarnermut apeqqut aamma killiligaanngitsumi pineqaatissinneqarnera aalajangiiffigineqartussaasimapput. Tamassumunngali killittoqarsimanngilaq pisuutitsisoqarnermut apeqqut pillugu eqqartuussiviup naliliinera unnerluutigineqartup akuerimmagu.
Nunatta Eqqartuussisuuneqarfia aamma killiligaanngitsumi pineqaatissiissut aalajangiiffigaat. Pinerluttuliornermi peqqarniisaarneq kiisalu Nakorsat eqqartuussinermi siunersiortagaasartut innersuussutaat toqqammavigalugit eqqartuussut tamanna aalajangersarneqarpoq.
Unnerluussisussaatitaasoq naammagisimaartoq
- Eqqartuussiviup aalajangeereernerata kingorna oqarnittut, angut ulorianartorujussuaq pineqarpoq. Siornatigut nakuusersimanermut, siorasaarisimanermut kiffaanngissusiiaasimanermullu eqqartuussaanikuuvoq, maannalu toqutisimasutut timimullu assuarnartuliorsimasutut eqqartuussaalluni, unnerluussisussaatitaasoq Gutti Harryson oqarpoq, taanna eqqartuussivimmi Nunattalu Eqqartuussisuuneqarfiani suliamik ingerlatsisuuvoq.
Taannalu annertunerusumik nassuiaavoq:
- Nakorsat eqqartuussinermi siunersiortagaasartut angutip killiligaanngitsumi pineqaatissinneqassanera aamma ersarissumik innersuussutigimmassuk isumaqarpunga killileriikkamik pineqaatissiisoqassagaluarpat innuttaasut illersorneqarnissaannut naammanngitsoq. Tamanna pillugu eqqartuussiviup nunattalu eqqartuussisuuneqarfiata isumaqatigaannga, tamannalu soorunami naammagisimaarpara.
Nunatta eqqartuussisuuneqarfiani eqqartuussummik aalajangersaanikkut suliaq kiisami inaarutaasumik aalajangiiffigineqarpoq.
