Toqutsinermi pinerluuteqartoq qanoq ittuugajuppa?
Nunatsinni 2024-mi toqutsinerit tallimaapput. Kisitsillu ukiumut agguaqatigiissillugu taamaakkajuttoq, Kalaallit Nunaanni Politiit pisortaata, Bjørn Tegner Bayip oqaatigaa.
Taamaakkaluartorli KNR-ip 2020-mit ullumikkumut toqutsinerit pillugit suliat misissuiffigalugit toqutsinerit kimit pinerluutigineqartarnerat paasiniaaffigai.
Suliat misissoraanni pinerluuteqartuni ilisarnaatit ilaat naak inuit assigiinngilluinnartut pineqaraluartut uteqqiapput.
Tarnip pissusianik ilisimasallip, namminersortup Nuummilu pinerluuteqarsimasunut inissiisarfimmi sulisup, Nanna Hildebrandtip aamma eqqartuussissuserisullu, Naja Joelsenip ukiuni 20-ni misilittagaqartup kiisalu politiit pisortaata, Bjørn Tegner Bayip tamanna oqaluttuaraat.
Taakku ataatsimoorlutik pinerluuteqarsimasup qanoq ittuuneranik takussutissiipput:
- Toqutsineq pinerluuteqartup sinnganeranik pissuteqarajuppoq, imigassartorsimatillunilu puuallassimasarluni. Toqutsinermi nalinginnaasumi pinerluuteqartoq pinerlineqartorlu 30-kkut qiteqqunneranni ukioqarajupput. Toqutsinerit avatangiisini qanigisani pigalupput. Pinerluffiusoq katisimasaasinnaavoq, aapparisaq imaluunniit aapparisimasaq taassumaluunniit aappartaarisimasaa, politiit pisortaat, Bjørn Tegner Bay oqarpoq.
Taanna 35-nik ukiulik meeraanermini sakkortuumik aqqusaagaqarsimagaluppoq, tarnip pissusianik ilisimasalik, Nanna Hildebrandt oqarpoq.
- Pinerluuteqartoq sakkortuumik peroriartorsimasuugajuppoq, inuttut pissusaa allanut inunnut naleqqussarnissamut isumaqarluartumillu atassummik pilersitsinissamut ajornakusoortumik inissisimasinnaavoq, taanna oqarpoq.
- Inuit allat eqqarsaataannik misigissusaannillu paasinnikkuminaatsitsisinnaavoq, immaqalu allat eqqarsaataannik misigissusaannillu soqutiginnippallaarani. Imminut avataaniit takujuminaatsissinnaallunilu toqutsinermik kinguneqartumik qisuariaateqarnermini imminut unitsissinnaanani, taanna oqarpoq.
Meeraanermini sakkortuumik aqqusaagaqarsimaneq pinerluuteqarajuttut inuuniarnerminni tunngavissarsiniarnerannut ajornakusoortitsisinnaasartoq, eqqartuussissuserisoq, Naja Joelsen oqarpoq.
- Amerlanertigut maluginikuuara tassa sumiginnarneqarsimaneq immaqa aamma angajoqqaavi sumiginnarneqarnikuupput, tassa kinguaariit marluk sumiginnarneqarsimasut. Taakku tassaapput tunngavissaminnik nassaarsimanngitsut imaluunniit ilaqutaqalersimanngitsut. Ilinniagaqanngillat, immaqalu meeqqat atuarfiat naammassinikuunagu. Angutaapput tunngavissarsisimanngitsut, siusinnerusukkullu aaqqissuussinermit isumagineqarsimanngitsut.
- Pisortat amerlanertigut ilisarisimalluartarpaat, pissutigalugu annikitsunik pinerluuteqarnermik aallartissimasarmata, aamma ilaqutariit pisortanit ilisarisimaneqartarput, eqqartuussissuserisoq, taanna oqarpoq.
Toqutsinermi pinerluuteqartup qanoq ittuuneranik Bjørn Tegner Bayip, Nanna Hildebrandtip aamma Naja Joelsenip nassuiaateqarnerat pillugu ilanngutassiaq KNR-imit ulluni tulliuttuni saqqummersissavarput.
