Toqutsineq pillugu misissuineq: Politiit Qaqortumi assaanertik unitsippaat
Politiit Qaqortumi Vatikanbakkenimi sapaatip akunnerata siuliata qiteqqunneranili assaallutik ulappupput.
Assaaneq maanna unitsinneqartoq, Qaqortumi Politiini politikommissæri, Søren Hansen oqarpoq.
- Inerneqanngitsumik assaavugut, taamaammat assaaneq unitsikkallarparput, taanna KNR-imut oqarpoq.
Suliaq politiit misissuiffigisaat ukiup ataatsip affaatalu matuma siorna tammaasaqartoqarneranut atatillugu suliaavoq.
Arnaq 35-nik ukiulik 2021-mi novembarimi tammarpoq. Taanna kingorna nassaarineqarnikuunngilaq. Politiit, qatserisartut, Issittumi Sakkutooqarfik namminerlu kajumissutsiminnik peqataasut ujaaseqataapput, iluatsinngitsumilli. Arnaq Kommune Kujalliup allaffiata silataani unnukkullu Brugseneeqqap eqqaani kingullermik takuneqarpoq.
AAMMA ATUARUK Angut 35-nik ukiulik Qaqortumi toqutsisutut pasineqarluni tigummigallagassanngortinneqartoq
Angut Qaqortumi politeeqarfimmukarluni toqutsisimanerminik nassuerutiginnissimasoq politiit sapaatip akunnerata siuliani tassanngaannartumik nalunaarutigaat. Politiit suliamut atatillugu paasissutissanik oqaatiginninngitsorujussuupput – angutilli tassanngaannartumik toqutsinermik nalunaaruteqarnera ujaasisoqarneranut suliamut atassuteqarsinnaanerarlugu.
Allatut oqaatigalugu: Ujaasisoqarneranut suliaq maanna toqutsisoqarsimaneranik suliatut misissuiffigineqarpoq.
AAMMA ATUARUK Ataatsimut isigalugu: Toqutsinerit pillugit suliani sisamani tamani pasineqartunik tigummigallaasoqartoq
Taamaammallu Vatikanbakkenimi assaasoqarpoq – kisianni inerneqanngitsoq Kalaallit Nunaanni Politiit oqaatigaat.
- Suliamik misissueqqissaarneq ingerlaannassaaq siumulli ilimaginnereertoqarsinnaanani, angut suli tigummigallarneqarpoq, politikommissæri, Søren Hansen oqarpoq.
Angut imminut nalunaarutigalugu toqutsinermik nassuerutiginnittoq 35-nik ukioqarpoq. Taanna toqutsisimasutut pasineqarluni sisamanngormat ulluni 28-ni tigummigallagassanngortinneqarpoq.
Politiit suliamut atatillugu allamik paasissutisseerusunngillat.
