Inuussutissarsiutit

TNGG millioninik arlalinnik pisortanut akiitsoqartoq

True North Gems Greenland, akiliisinnaajunnaaqqammersoq, marloriarluni Greenland Venturemit millionit koruunit arlalinnik atukkinneqarsimavoq.

Direktør for Greenland Holding A/S og Greenland Venture A/S

Allattoq Mads Pedersen, Anton Gundersen Lihn

septembarip 07-at 2016 17:45

7,3 millionit koruunit. Taamak amerlatigisunik TNGG Greenland Venturemit atorsimasoq, Greenland Venturemi pisortaq KNR-imut ilisimatitsivoq.

- TNGG 2013-imi 4 millionit koruuninik atornikuuvoq 2014-imilu 3,3 millioninik atornikuulluni, Karsten Høy KNR-mut oqarpoq.

Greenland Venturep aningaasat tamarmik tigoqqissagai ilaminanngilaq.

- TNGG-p akiliisinnaajunnaarnerata kingorna akisussaasoq utaqqiinnarsinnaavarput. Aningaasat alia tigoqqissallutigit naatsorsuutigaarpullu , Høy oqarpoq.

Aamma atuaruk LNS: Rubisiorfiup ingerlaannarnissaa qulakkeerusupparput

Aningaasat atukkiunneqarsimasut aappaagu utertinneqartussaagaluarput. Massakkulli Greenland Venture ukiuni marlunnik utaqqisariaqarinnaavoq.

TNGG-p kikkut taarsigassaqarfigalugillu akiligassaqarfiginerai akiliisinnaajunnaarnerup kingorna akisussaasunngortup misissussavai. Tamakku tamaasa inissereerpata aatsaat aningaasassallik aningaasanik tunineqarsinnaasut akiliisinnaajunnaarsimasumut akisussaasoq Peter Schriver KNR-imut ilisimatitsivoq.

Aamma atuaruk Randi Vestergaard: Tusagaq ajuusaarnartorujussuuvoq