Randi Vestergaard: TNGG-ip akiliisinnaajunnaarnera qanoq annaasaqaataatiginera nalunarpoq
Ingerlatseqatigiiffiup pigisai eqqartuussissuserisunit suliarineqareerpata aatsaat tamanna paasineqarsinnaassasoq, Mute B. Egedep paragraf 37-imut apeqquteqaateqarneranut akissuteqarluni aningaasaqarnermut aatsitassanullu Naalakkersuisoq Randi Vestergaard Evaldsen allappoq.
TNGG-illu misissuinermi ujaqqat pinnersaasiat qanoq amerlatigisut ilanngussimannginnerai qanorlu naleqarnersut, Inuit Ataqatigiinneersup aamma paaserusuppaa.
Aamma atuaruk Rubinisiorfik neriulluartitsigaluartoq
Randi Vestergaard Evaldsenip akissuteqarnera naapertorlugu korundit silisat silineqanngitsullu ujaqqallu korundimik akoqartut 1.400 kilot Canadami USA-milu najukkani uninngasuutineqarput. Ujaqqalli taakku aatsaat tunilerneranni nalilersorneqartarmata nalilersorneqanngillat. Aatsitassanullu oqartussaasoq ingerlaavartumik ujaqqanik nakkutilliiartortartoq, Randip Vestergard Evaldsenip oqaatigaa.
Aatsitassat nunatsinnut uterteqqullugit Canadami True North Gems Inc. aatsitassanut naalakkersuisoqarfimmit attavigineqarsimasoq, Randi Vestergaard Evaldsenip Mute B. Egedemut akissuteqarnermini aamma oqaatigaa.
- Aatsitassanut Ikummatissanullu Naalakkersuisoqarfik Canadami True North Gems Inc.-imut saaffiginnippoq. Saaffiginnissummi True North Gems Inc.-imut aammaloortumik paasissutissiissutigineqarpoq, ingerlatseqatigiiffiup aatsitassat atorsinnaanngikkai, ilanngullugu tunisinnaanngikkai. Taamatuttaaq akiliisinnaajunnaarnermik nalunaaruteqarnerup tunniunneqarneranut atatillugu, aatsitassat sapinngisamik piaartumik uterteqqullugit ingerlatseqatigiiffik ilitsersorneqarpoq, tassani ilaalluni isumannaatsumik angallassinerup isumagineqarnissaa. Maannakkorpiaq TNGG-p akiliisinnaajunnaartutut suliaqarfigineqarnerani, misissugassat tunngaviusumik eqqartuussissuserisup pigisanik isumaginnittuusussap paarisai, Randi Vestergaard Evaldsen akissummini allappoq.
Aamma atuaruk LNS rubisiornissaminut piareersimavoq
Ujaqqat pinnersaasiat nunatsinnit piiavimmeersut TNGG-ip tunisimanngikkai, Randi Vestergaard Evaldsenip oqaatigaa.
