Tivoli ukiunik 180-iliilersoq
Kalaallit amerlasuut Danmarkimiinnerminni Tivoliliarnissartik nuannarisaqaat. Pingaartumik Kalaallit Nunaat Tivolimi ukiut tamaasa aggustip aallaqqaataata missaani aaqqissuunneqaraangat orniguttarlutik.
Danmarkimi nuannaariartarfiit ilisimaneqarnerpaat, Tivoli, aggustip ulluisa 15-ianni ukiunik 180-iliissaaq. Sapaatip-akunneranik sivisutigisumik tamanna nalliuttorsiutigineqassaaq, tamannalu sapaammi aggustip ulluisa 13-ianni aallartissalluni.
Tivoli taamaalinerani pinnersarneqarsimassaaq, meeqqallu immikkut ittumik susassaqartinneqarnissaannut aggersarneqassallutik, Tivolillu ukiunik 180-iliineranut atatillugu pulaartunut immikkut ittumik taassuma saniatigut aamma takornarniartitsisoqassalluni.
Tivolip pilersitsisuata Georg Carstensenip inuit 3000-nit amerlanerusut 1843-mi aggustip ulluisa 15-ianni tikilluaqquai.
Kinamiut, Tyrkiamiut Pompeiimeersullu illuliaattut sanaat Tivolimut isertut taamanikkut takusinnaavaat, qulliit assigiinngitsunik qalipaatillit, rutsjebanit, tusarnaartitsisoqarneratalu nalaani nerisassanik imeruersaatinillu sassaallertoqarluni.
Inunniillu assigiinngitsunik Tivolimi piffissap ingerlanerani aamma saqqummersitsisoqartarnikuuvoq kalaallit, Vestindiallu qeqertaanneersut taakkununnga ilaallutik. Den Danske Koloniudstillingimi 1905-imi tamanna pivoq.
Inuit nalitsinni soorunami saqqummersinneqartarunnaarnikuupput, Tivolili nuannaariartarfittut ukiut ingerlaneranni alliartupiloorsimavoq, nipilersukkanillu tusarnaariartarfittut aamma nuannarineqaleraluttuinnarsimalluni.
Tivolip aggustip ulluisa 15-ianni ukiunik 180-inngortorsiorneqarnerata nalliuttorsiutigineqarnera qummoroortartoqarneranik soorunami naammassineqassaaq.
