Meeqqat kinguaassiuutitigut atornerlunneqarsimasut sukkanerusumik apersorneqarsinnaalersut
Meeqqanik kinguaassiuutitigut atornerlunneqarsimasinnaasunik Kalaallit Nunaanni politiit paasiniaasarnerat ukiup ataatsip ingerlanerani malunnartumik sukkanerulerpoq.
Politiit amerlanerusut ilinniaqqinnerat tamatumunnga pissutaavoq.
Kalaallit Nunaanni politiit 2019-ip aallartisimalernerani suliaanni meeqqat inuussuttuaqqallu kinguaassiuutitigut atornerlunneqarsimasut salliutinneqarnerpaapput.
Tamannalu ukiukitsut kinguaassiuutitigut atornerlunneqarsimasut pillugit politiit suliaqartarnerisa nalunaarsorneqarneranni ajunngilluinnartutut takuneqarsinnaavoq.
Tamanna Danmarkimi inatsisinut atuutsitsinermut ministereqarfimmi suliarineqartumi nalunaarusiami, KNR-ip pissarsiarisimasaani takuneqarsinnaasoq.
Kalaallit Nunaani meeqqanut inuussuttuaqqanullu kinguaassiuutitigut atornerluisarnermut ataatsimoorluni pinaveersaartitsineq
- Danskit naalakkersuisui Kalaallit Nunaanni meeqqanut inuusuttunullu suliniuteqarnernut pitsanngorsaataasussanik 2019-imi 5,3 mio. kr.-nik pinasuartumik aningaasaliipput
- Folketingemi amerlanerussuteqartut suliamut tapiissutissanik 2020-mit 2023-mut atorneqartussanik 80 million kr-nik 2019-mi novemberip qaammataani immikkoortitsipput.
- Naalakkersuisut meeqqanut inuusuttuaqqanullu atornerlunneqarsimasunut suliniutinut atugassanik 7,5 million kr-nik 2020-mut aningaasanut inatsimmi immikkoortitsipput.
- Namminersorlutik Oqartussat danskillu oqartussaasui pingaartumik danskit isumaginninnermut aqutsisoqarfia Kalaallit Nunaanni meeqqanut inuusuttuaqqanullu suliniuteqarnerup nukittorsarneqarnissaanut suleqatigiipput.
- Kalaallit Nunaani kinguaassiuutitigut atornerluisarnerit peqquserluttuliortarnerillu politiinut nalunaarutigineqartartut Danmarkimut Savalimmiunullu sanilliullugit arfineq pingasoriaammik amerlanerupput.
Nalunaarusiami Kalaallit Nunaanni inuusuttuaqqat meeqqallu kinguaassiuutitigut atornerlunneqarsimasut pillugit Kalaallit Nunaata Danmarkillu ataatsimoorlutik suliniutigigallagaat erseqqissarneqarpoq.
AAMMA ATUARUK Kingunerlutsitsisimasunut katsorsaariaasertaat nunatta meraartaannut iluaqutaassasut
Meeqqat 15-it inorlugit ukiullit kinguaassiuutitigut atornerlunneqarsimanerisa nalunaarutigineqarnerannit video atorlugu aporsuinissamut piffissaq politiit atortagaat sivikinnerulersimasoq nalunaarusiami takuneqarsinnaavoq. Ukioq 2018-imi qaammatini tallimani siullerni video atorlugu apersuinissamut ullunit 106,7-imit 2019-mi agguaqatigiissillugu ullunut 64,5-inut ikileriarput.
Suliap suliarineqarneranut piffissaq atorneqartoq 2018-mit 2019-mut ullunut 42-inut ikileriarput.
Ilinniaqqinnerit inillu apersuinissamut atorneqartartut immikkut ittut
Suliat suliarineqartarnerisa sivikillinerannut suliniutit arlaqarput:
Kalaallit Nunaani politiini politiassistentit 15-it meeqqanik kinguaassiuutitigut atornerlunneqarsimasunik video atorlugu apersuinissaannut ilinniartinneqarput, 2020-milu politiit marluk ilinniartinneqarnissaat naatsorsuutigineqarpoq.
Nuna tamakkerlugu video atorlugu apersuinerit nakkutigineqarnissaannut ataqatigiissarneqarnissaannullu politikommissæreq toqqarneqarpoq.
Taakkua saniatigut, politiit kuffertinik 17-inik meeqqat apersorneqarneranni eqqissisimanissaanut atorneqarsinnaasut imaqartunik tunineqarput. Soorlu meeqqanut mikinerusut naleqquttut bamsit aamma titartaarnermut atortut.
AAMMA ATUARUK 80 millionit koruunit kalaallit meerartaannut Folketingimit aningaasaliissutigineqarput
Politiilli ilinniartiinnarneqanngillat. Meeqqammi apersorneqarnissaannut ininik meeqqanut naleqqunik politiit aamma ujaasileruttorput.
Tassani Namminersorlutik Oqartussat, Kommunit Danmarkimilu inatsisinut atuutsitsinermut ministereqarfik suleqatigineqarput, inillu meeqqat apersorneqartarnerannut atorneqartussat kommunini ilaqutariinnut sullissivinniittassagunartut, nalunaarusiami atuarneqarsinnaavoq.
Suliat sivikinnersumik suliarineqartalernerat inatsisinut atuutsitsinermut ministerip Nick Hækkerup nuannaarutigaa.
- Suliniutinik ajunngitsunik arlalinnik aallartitsisoqarpoq, tamannalu politiit tamatumunnga suliniuteqarnerannut pitsanngorsaataavoq, Nick Hækkerup oqarpoq.
AAMMA ATUARUK Isumaginninermi siunnersortit siulittaasuata najoqqutassiaq nutaaq qujarukaa
Kiisalu Kalaallit Nunaanni politiit pisortani sulisut aamma immikkut ittunik suliaqartut meeqqanik kinguaassiuutitigut atornerlunneqarsimasunik pasitsaassaqarsimagunik sianerlutik siunnersortiffigisinnaasaannik aqqutissiuunneqarfigisinnaasaannillu 2019-imi oktobarimi pilersitsipput.
Inatsisinut atuutsitsinermut ministereqarfiup nalunaarusiaa naapertorlugu politiit oqarasuaammut tassunga ullut tamaasa sianerfigineqartarput.
