Isumaginninermi siunnersortit siulittaasuata najoqqutassiaq nutaaq qujarukaa

Isumaginninnermut naalakkersuisup, Martha Abelsenip, meeqqqanik kinguaassiutimikkut atornerlunneqarsimasunik immikkut suliaqartunut najoqqutassiaq nutaaq sisamanngormat saqqummiuppaa.

isumaginninermi siunnersortit Inunnut imaannaanngitsumik nalaataqarsimasunik sullissisunut ilaapput. Atuagarlu Nunatsinni Inunnik Isumaginninnermik Siunnersortitut Ilinniarsimasut Peqatigiiffiata NIISIP-ip siulittaasuata atuareerlugu takulluarnartippaa.

- Uani pitsaaqutigivaa, uagut oqaatsigut atorlugit allagaagami. Aamma kikkunnulluunniit tamanit inulerisunut atorneqarsinnaalluni.

Atuagaq tamanit atorneqarsinnaavoq

Atuagaq aamma immikkut suliaqartuunngitsunit atorneqarsinnaavoq.

- Soorlu ilinniagaqarsimanngikkaanni tiguinnagaasimagaanni. Taava uani pingaaruteqarpoq oqariartuutit allat assigiinngitsut taassuma iluaniittut ersarissorujussuupput atorluarneqarsinnaasut iluaqutaasutut.

AAMMA ATUARUK Atornerlunneqarsimasoq: - Sunaaffa oqilisussaasimasut

Atuakkami meeqqap pissusilersuutai allanngorpata suna eqqumafigisariaarnersoq ilaatigut allaaserineqarpoq.

- Soorlu immaqa meeqqat inuusuttulluunniit pissusaat allanngorpata maluginiarnerusinnaallugit. Immaqa pasitsaassisoqartaraluarpoq kisiannili qisuariarnissaminut nalullugu suna killissaq, uanga qaqugu qisuariassaanga? Taava uani paasissutissat ersarinnerusumik atornissaanut ilikkariartuaaraanni eqqumaffissaq annertusiartornerusinnaapput, Ida Abelsen opqarpoq.

Piginnaanngorsagassaqartoqarpoq

Isumaginninnermi siunnersortit allanik sakkussaqareeraluartut, atuagaq iluatinnaateqartoq, meeqqanik atornerlugaasimasunik sullissisut suli ilinniartinneqarneruariaqartut, peqatigiiffik isumaqarpoq.

- Atuakkat nammineq tamaasa matussusernavianngilai uani aamma uagut inuiaqatigiinni amigaatigivagut inulerisunut pikkorissarfissat. Ilinniartitsisuugunik, meeqqerisuugunik, siunnersortiugunik imaluunniit peqqinnissaqarfinni meeqqanut inuusuttunullu sullissisaruni. Ilinniaqqiffiusinnaasut, soorlu kinguaassiutitigut kannguttaatsuliorfigineqarsimasut imaluunniit pasitsaassimasaqarutta pikkorinnerulerfigisinnaasagut. Taavalu aamma attaveqariaaseq qisuariaataasartut allallu ersiutit tamakku pikkoriffiginerulersinnaavagut.

Atuagaq uani atuarneqarsinnaavoq.