Timmisartut Boeingimeersut timmisartuussisinnaaqqilissasut
USA-mi timmisartut Boeingimeersut 171-it timmisartuussinernut silaannakkut angallannermi USA-mi aqutsisoqarfimmit pingasunngornermi atorneqaqqissinnaalersinneqarput. Timmisartut pineqartut januaarip ulluisa tallimaanniilli timmisartuusseqqusaajunnaarsinneqarallarput.
Timmisartut misissoqqissaarneqareerpata timmisartuussisinnaaqqilissasut, silannakkut angallannermi USA-mi aqutsisoqarfiup nalunaarutigaa.
Alaskami timmisartuutileqatigiiffiup Alaska Airlinesip timmisartuisa ilaata igalaava timmisartuussinerup nalaani tassanngaannartumik katammat timmisartut Boeingimit sananeqarsimasut timmisartuusseqqusaajunnaarallartinneqarput.
Alaska Airlinesip timmisartua ajutoormat inunnik ajoqusertoqanngilaq, ajornerusumillu pisoqannginnera isumannaallisaanermi suliallit soorunami nuannaarutigaat.
Timmisartoq 5000 meteritut qutsitsigisumiitsilluni igalaavisa ilaat tassanngaannartumik katappoq, issimasullu 171-it anersaartuutilersorneqalerlutik.
Timmisartup ajornartoornermi minnissaa timmisartumi inuttat arfinillit taava suliarilerpaat, timmisartorlu qangattarnermi kingorna 20 minutsit qaangiummata timmisartoqarfimmut nunnippoq.
Timmisartut timmisartuusseqqusaajunnaarallartinneqartut 171-it, Alaska Airlinesip timmisartuanut assingusumik sanaajupput, misissoqqissaarneqareernermilu aatsaat timmisartuusseqqissinnaassallutik.