Timmisartuutileqatigiiffiup Boeingip timmisartuliai atorunnaarallarai
Timmisartuutileqatigiiffiup United Airlinesip timmisartut Boeing 777-it atorunnaarallarpai. Timmisartormi taamaattoq sapaatit-akunnerata naanerani motooriiarpoq, USA-milu illoqarfimmut Denverimut ajornartoorluni nunnittariaqarsimalluni.
USA-mi taama pisoqareersorlu, Japanimi oqartussat sukannernerusumik iliuuseqarput, Boeing 777-it atorunnaarallartillugit.
Japanimi siorna decembarimi assingusumik pisoqarsimagunarpoq.
Timmisartoq Boeing 777-eq decembarip ulluisa sisamaanni qangattarsimatsiaannarluni motooria ajoquteqalersimasoq, Japanip angallannermut ministereqarfiata ilisimatitsissutigaa.
AAMMA ATUARUK Boeingip timmisartuisa ilaannik Europami timmisartuussisoqaqqissinnaalertoq
Tamanna USA-mi arfininngormat pisumut assinguvoq, timmisartormi Denverimit qangattarsimatsiaannarluni motooria talerperleq qaartoorlunilu ikuallalerpoq.
Motoorip ikullannera ilaasumit assilineqarsimasoq takuneqarsinnaavoq.
Timmisartoq 231-nik issimasoqarlunilu qulinik sulisoqarluni Denverimit Hawaiimukartussaagaluarpoq. Timmisartup motooriiarnerani ajoqusertoqanngilaq.