Boeingip timmisartuisa ilaannik Europami timmisartuussisoqaqqissinnaalertoq
Timmisartuliorfiup Boeingip timmisartuisa ilaat, Boeing 737 MAX, ukiuni marlungajanni atorneqarsimanngeriarluni ilaasoqarluni Europami pingasunngornermi timmisartuussivoq.
Boeing 737 MAX-it marluk 2018-imi 2019-imilu nakkareersullu, timmisartut taakku angallassinermut atorneqaqqusaajunnaarallarput.
Belgiami timmisartuutileqatigiiffik TUI Boeingip timmisartua 737 MAX atorlugu Europami timmisartuusseqqittalerpoq. Belgiap illoqarfiisa pingaarnersaannit Bruxellesimit Spaniami illoqarfinnut Alicantemut Malagamullu timmisartuussisoqarpoq.
AAMMA ATUARUK Timmisartuusseqqusaajunnaarneq Boeingimut amigaartoortitsisoq
Timmisartoq Bruxellesimi ullaakkut nalunaaqutaq qulinut qiteqquttoq qangattarpoq, pilersaarutillu malillugit nalunaaquttap akunneri marluk qaangiummata nunnilluni.
Boeing 737 MAX atorlugu Europami timmisartuussisoqaqqissinnaalernissaa, EU-p silaannakkut isumannaatsumik angallannermi qullersaqarfiata, Easa-p, januaarip ulluisa 27-anni akuersissutigaa. USA-mi silaannakkut angallannermi oqartussat Boeing 737 MAX-ip atorneqaqqissinnaalernissaa qaammatit marluk matuma siornatigut akuersissutigaat.
Timmisartumik Boeing 737 MAX-imik aappassaanik 2019-imi nakkartoqareersorlu, taakku atorlugit 2019-imi marsimi timmisartuusseqqusaajunnaartoqarallarpoq. Inuit katillutik 346-t timmisartut taakku nakkarneranni ajunaarput.