Timmisartoq ilaasumik russit rakitsiannit eqqorneqarsimavoq
Hollandimiut ajutoortoqartillugu misissueqqissaartartuisa nalunaarusiaanni taama inerniliisoqarpoq.
Rakitsip igeriunneqartup timmisartup aquttarfiata saamiatungaatigut eqqorsimagaa, ajutoortoqartillugu misissueqqissaartartut oqaaseqartittagaat oqarpoq. Nalunaarusiaq sivisuumik utaqqineqarsimalluni pisortatigoortumik ullumi marlunngornermi saqqummiunneqarpoq.
Ukrainemi akersuuttoqarnerani akersuuffiusup silaannartaa matuneqarsimasussaagaluartoq, ajutoortoqartillugu misissueqqissaartartut oqarput.
Kikkut pisuutinneqarnissaannut ajutoortoqartillugu misissueqqissaartartut pisussaaffiginngilaat, rakitsilu kikkunnit igeriunneqarsimanersoq nalunaarusiami takuneqarsinnaanani.
Malaysiamiut timmisartuat MH17 298-inik ilasoqarluni Hollandimi Amsterdamimit Malaysiamut Kuala Lumpurimut ingerlaartillugu rakitsimik eqqorneqarluni siorna juulip ulluisa 17-anni nakkartinneqarpoq.