Timmiaq: Naajat nallinnaqaat
Qavaat naajat ikilisarnissaannut sakkussatsialammik nassaarlutik nuannattut peqatigiiffik Timmiaq avaanngusuppoq. Taakku isumaqarput Kommune Kujallermiut timmissat pillugit nalunaarut unioqqutikkaat, tassani aalajangersarneqarnikuummat timmiaruarniarnermi sakkut sorliit atoqqusaanersut.
Ippassigami Nanortalimmi naajat 52-it pisarineqarput nalunaaquttap akunnerisa marluk ingerlanerinnaanni. Naajarniutigaat pullatit nerisassat sinnerinik narajallit.
- Narrujuumminarpoq ileqqorissaarnerunanilu kommunip timmissat nerisassat sinnerinik illoqannginnersani uanilu eqqaavissuarmi nerleriarlugit toqorarmagit nungusarniaannarlugit, Timmiami allatsi Hasse Hedegaard oqarpoq.
Taassuma inuit avoqqaarai nerisassat sinnikui tonsilikkaat puisillu sinneri eqqaannartarmatigit. Tamakku pissutigalugit illoqarfiit naajarpassuaqalersimapput. Aamma naajanik toqoraaneq timmissat pillugit nalunaarummik unioqqutitsinertut nalilerpaa. Timmiap naliliinera malillugu pullatit atorlugit timmiarniarneq Nunatsinni inerteqqutaavoq.
Hasse Hedemand isumaqarpoq naajaqarnera tulugaqarneralu qujamasuutigiinnartariaqaripput taakkumi inuit illoqarfinni asimilu eqqagaannik saliisuummata.
