Assammik arsarnermi tusaamasaat: Timersuutit arlariisillugit peqatigiiffikkaartumik timersortarlernissamut qammaatigaat
Meeqqat 70-it missaaniittut timersoqatigiiffiup K-33ip timersortitsilluni sports campeqartitsinerani peqataapput tassanilu periuserineqarpoq meeqqat inuusuttuaqqallu timersuutinut tamalaanut soqutiginnilersinnissaat.
Siornatigut kalaalllit assammik arsarnermi nunanut allanut unammisartuiniittoq maannalu Danmarkimi pikkorinnerni sungiusaasoq Jakob Larsen assammillu arsarnermi tusaamasaq Maren Aardahl tassani ilitsersuisuupput.
Arsaaffimmi arsaattoqarpoq timersortarfimmilu arsaaffiup eqqannguaniittumi assammik arsartoqarluni. Periuseq taanna toqqarneqarpoq timersuut ataasiinnaq toqqagassaatikkaanni nalunaartut ikippallaarsinnaammata. Periutsimili uani aamma isumaliutiginnittoqareerpoq.
- Immaqa uannut toqqoqqalaartuik anguniagaavoq arsaattartut iserlutik aamma assammik arsarnermik misileerusulernissaat illuanillu assammik arsartartut arsaakkusulerlutik, Jakob Larsen KNR-mut oqarpoq.
Timersuutit akimorlugit
Nunarsuup sinneranitut arsaanneq timersuutini Nunatsinni anginersaavoq. Assammik arsarneq arsaannerlu ataatsikkoortillugit ingerlatsineq timersuutit taakku akornanni soqutiginnilersitsisimarpasippoq arsaattartut arsaq assamminnik ingerlatilermassuk.
- Ippassaq sungiusarnerup kingorna takuara timersortarfimmi assammik arsalersimasut unammineq namminneq aaqqissuullugu. Assammik arsarnermi nuannarisaqartutut assorsuaq tamanna nuannaarutigaara assammik arsarnermi unamminissamik aaqqissuussineq ajornakusoortarmat. Tassami tamatigorluinnangajak arsaanneq toqqarneqartarpoq, Jakob Larsen oqarpoq.
K-33p sports campertitsinerani annerusumik anguniagaavoq meeqqat inuusuttuaqqallu timersoqatigiiffitsigoortumik timersortittalernissaat. Meerarpassuit aatsaat timersornermik soqutisaqarnialerfiup nalaaniipput.
Arsaassutinik alersilerlutik assammik arsartut
Tamanna Norgemeersup Maren Aardahlip maanna Odensen Håndboldimi unammisartuusup ilisarsiffigilluarpaa, taannalu qaammatip ataatsip matuma siorna Champions Leaguemi sølvinnaqataavoq.
- Uannut ilimagaaralu aamma meeqqanut pingaarneruvoq ikinngutit peqatigalugit arsamik pinnguarnissaq, Maren Aardahl KNR-mut oqarpoq.
- Aamma takuakka ikinngutigiippassuit tassanngaanniillu aallartiffeqakkajuppoq ukiullu tulliit assammik arsarneq ingerlalersinnaavoq ikinngutit peqatigineqarmata. Aammali takuakka nukappiaqqat arsaattartut arsaassutinik alersilerlutik assammik arsartut. Neriuppugut aamma taakku peqatigereerunitigut illup iluani timersorneq aamma aallutilerumaaraat, Maren Aardahl oqarpoq.
Eqqaaneqareersutut ukioq unammiffiusoq sakkortooq naammasseqqammerpaa Odense Håndbold peqatigalugu Danmarkimi pissartanngoqataalluni aamma peqatigiiffikkaartumik Europami unammersuarnerit sakkortunersaanni Champions Leaguemi sølvinnaqataalluni.
Kujataanut tikinneq akissarsiutigalugu assammik arsartartuunermiit allaanerulluinnarpoq pinngortitaq avatangiiseq kusanarluinnarmat.
- Norgemeersuullunga pinngortitaq sungiusimagalarlugu allaanerulluinnarpoq aammami meeqqanik sungiusaaneq nuannarilluinnarakku, Maren Aardahl Trondheimimeersuusoq oqarpoq aammalu Nunatsinnut qaaqquneqaqqissagaluaruni nangaanngivilluni akuersiumaarluni oqarpoq.
