Timersortartut inuusuttut piginnaasaqarluartut Danmarkimi efterskolertut katersuutsinneqartut
Elite Sport Greenland aappassaa taama katersortitsivoq, Elite Sport Greenlandip piginnaasalinnik ineriartortitsisarneranut tamanna ilaalluni.
- Elite Sport Greenland Kalaallit Nunaanni timersortartunik piginnaasaqarluartunik amerlanerulersitsinissamik siunertaqarpoq. Piginnasaqarluartut amerlinerisigut Nunarsuarmi pissartanngorniunnerni, OL-ertoqarnerani nunallu tamalaat akornanni unammersuarnerni Kalaallit Nunaat sinnerlugu unammisartut amerlissapput. Piginnaasalinnik Kalaallit Nunaanni timersorneq qaffassassavarput, Elite Sport Greenlandimi siulittaasoq Malik Hegelund oqarpoq.
Elite Sport Greenlandip katersuutsitsinerani peqataasut timersornermik piginnaasaqarluartutut timersortuunermut periutsit pisariaqartut sammissavaat, assersuutigalugu timersornissamut nerisaqarnermullu pilersaarusiorneq, eqqarsartaatsikkut sungiusarneq ilinniagaqarnerlu sammineqassallutik.
Inuuniutigalugu timersortartut arfininngornermi unnukkut oqaloqatigineqassapput, Angutimmarik Kreutzmann, Malik Juhl, Akutaaneq Kreutzmann, Mia Rasmussen Minik Dahl Høeghilu oqaloqatigineqarsinnaassallutik.
Kattuffiit tamarmik immikkut nunanut allanut unammisartut sungiusaasuisa peqataasussat toqqassavaat.