Timersortartut angalanissaannut malittarisassat nutaat aningaasarpassuarnik naleqarsinnaasut

Timersoriat kilometerit hundredet arlallit umiatsiaaqqanik angalasarunnaassapput.

Inuunermik navialisitsinissaq pitsaaliorniarlugu Kalaallit Nunaanni timersoqatigiit kattuffiat GIF piumasaqarpoq timersoriarluni angalanerit ilaasunik angallassinissamut akuerisaasunik angallateqarluni pisalissasut.

- Ukiut kingulliit naammagittaalliutinik isornartorsiuinernillu apuussiffigineqartarpugut timersoriat ilaasunik angallassissutitut akuerisaanngitsunik angalasarnerat pillugu, GIF-mi siulittaasoq Nuka Kleemann KNR-mut oqarpoq.

- Nalilersimavarput inuunermik akeqarnissaa utaqqiinnarnagu arlaatigut iliuuseqarfigisariaqarlugu, aalajangerneq pillugu Nuka Kleemann nassuiaavoq.

Pingaartumik isikkamik arsaattoqassatillugu timersoriat angallatinik ilaasunik angallassissutitut akuerisaanngitsunik angallattarput.

Aningaasaqassuseq aalajangiivoq

Ilaasunik angallassinissamut akuersissutit imarsiornermut aqutsisoqarfiup tunniuttarpai tassanilu piumasaqaatinut ilaavoq inuttat ilaasunik angallassinissamut ilinniagaqarsimasuunissaat.

Umiatsianik angalanissaq timersortartut toqqakkajuttarpaat aningaasaqassuseq tunngavigalugu. Taamatut pisut ilagaat SAK Sisimiuneersoq aasaq GM-rtoqarnerani anngunniuteqqaariarlutik GM-ip naggataarnerani Ilulissani peqataasut.

SAKp arsaannermut immikkoortoqarfianiit Peter Olsen angalanissanik pilersaarusiortuuvoq. Taanna imarsiortutut ilinniarsimasuugami isumannaallisaaneq eqqarsaatigalugu GIF-p aalajangerneranik apeqqusiinngilaq.

SAK-lli iligiit allat assigalugit aningaasaqarniarnini misissoqqaaarlugu Maniitsumut anngunniukkialeramik umiatsiaaqqanik angalanissaq toqqarpaat.

- Suliffeqarfik ilaasunik angallassinnissamut akuerisaasunik pigisaqartoq paasiniaaffigakku oqaluttuunneqarpunga siumuinnaq angallatsinnissaq 50.000 koruuninik akeqassasoq aammalu angerlamukarnissanut aamma suli 50.000 koruuninik akeqassasoq. Tassa imaappoq anngunniunnerinnaq eqqarsaatigalugu aningaasartuutissavut 100.000 koruuninngoreeraluarput, Peter Olsen oqaluttuarpoq.

- GIFp aalajangernera apeqqusinngiklarput, taamaattoorli uagut timersoqatigiiffittut aningaasanik taama amerlatigisunik katersisinnaanngilagut, Peter Olsen oqarpoq, ilanngullugu oqaatigaa umiatsiaaqqanik angalanermikkut neqeroorutip affaa ataallugu aningaasartuuteqarutik.

Kikkut akilissavaat?

Taamaattumiguna kalaallit arsaattartut kattuffiat KAK GIFip aalajangerneranut akerliusoq ikinnerussuteqarlunili.

KAK siunnersuuteqarpoq kommunet, namminersorlutik oqartussat timersortartullu kattuffii aningaasatigut aaqqiissutissamik ujarleqatigiissasut tassami tullianik unammersuartoqalerpat unammilligassaq takkuttussanngormat.

- Nalunngilarput avataasiorlutik aalisartut nunatta pisuussutai atorlugit aningaasarpassuarniik kaaviiaartitsisartut. Taakku kalaallit timersortartuinut tapiinerusariaqarput, Peter Olsen SAK-meersoq oqarpoq.

GIF-mi siulittaasup Nuka Kleemannip siunniussaq aalajangiusimavaa aalajangernermilu tunngaviusoq tunaartaralugu.

- Kattuffiit timersortartullu ataasiakkaat nammineq isumaliutisariaqarpaat angallatit inuunermik akeqarsinnaasut angallatigisarusunnerlugit, Nuka Kleemann oqarpoq.

Arsaannermi iligiit aasaanerani pissartanngorniunnermi kilometerit hundredet arlallit umiatsiaaqqanik angallapput maannalu tassa angallatit ilaasartaatit timmisartulluunniit kisiisa toqqagassarilerlugit.