Timersornermi sungiusaasut ajunngitsorsiassaqalernissaat oqallisaasoq
Timersuutit arlallit pissartanngorniunnerni peqataasukilliartorput. Tamanna iliuuseqarfiginiarlugu sungiusaasut ajunngitsorsiassaqalernissaat Naalakkersuisut sulissutigaat. Timersoqatigiit kattuffiat tusarniaaffigineqarpoq.
Timersornermut Naalakkersuisoq Nivi Olsen oqalugiarpoq Kalaallit Nunaanni timersoqatigiit kattuffiat GIF ileqquusumik tallimanngormat ataatsimeersuarmat. Timersuutit arlallit ajornartorsiuteqarfigisaat oqalugiaammi tikippaa.
- Timersuutini assigiinngitsuni pissartanngorniunnissat qilanaarisarpagut. Naalakkersuisuniilli eqqummaariffigaarput pissartanngorniunnerni peqatigiiffiit peqataatitaqartartut ikiliartortut. Allaat peqatigiiffiit angusarissaartartut peqataaniaratik nalunaartalerput, Nivi Olsen oqarpoq.
Timersuutit angisuut soorlu silami arsaanneq, assammik arsarneq timersuutillu allat peqataasukilliartorput.
Nukissaalatsineq
Assersuutigalugu timersuutit ilaanni pissartanngorniunnissat sioqqullugit anngunniuttoqartaraluarpoq. Peqatigiiffiilli peqataaniartut ukiuni kingullerni peqataatiinnarneqartarput nalunaartut ikippallaarnerat pissutigalugu.
- Peqatigiiffinni nukissaalatsisoqarneratut tamanna paasivarput. Taamaattumik isumaqarpunga peqatigiiffinni sungiusaasut ajunngitsorsisalernissaat aqqutissiuuttariaqalersoq, Nivi Olsen oqarpoq.
Ilinniartitaanermut, kulturimut, timersornermut ilagiinnullu naalakkersuisoqarfik timersoqatigiit kattuffiannik ataatsimeeqateqarpoq tassanilu sungiusaasut ajunngitsorsiassaqalernissaat eqqaaneqartut ilagivaat.
- Nammineq piumassutsimik suliniartut ajunngitsorsiassaqalernissaat pillugu eqqartueqataarusuppugut. Maanna sungiusaasut immikkut taaneqartut aaqqiissutissallu ilusilersornissaani oqaloqataarusuppugut, GIF-mi siulittaasoq Claus Nielsen KNR-imut oqarpoq.
