Timersoqatigiit Kattuffiat : Naatsorsuutigaarput unammisartuutigut piareersarluarsimanissaat

Island Games 2013-imi Nunarput unammisartunik 84-inik Bermudamut aallartitaqarpoq, timersuutillu assigiinngitsut arfineq-marluk Nunatsinnit peqataatinneqarlutik. Taakku akornanni sisamaannaat medaaliannapput, Timersoqatigiit Kattuffiat tusagassiutinut nalunaarumminni allapput.

Badmintonimi angutini iligiikkaani guultinnattut marluusut tassaapput, Taatsiannguaq Pedersen aamma Bror Madsen. 
Isikkamik arsaattartut arnat angutillu tamarmik immikkut sølvinnapput, arnallu volleyballertartut bronzinnallutik.

Island Gamesimilu tulliuttumi, Tululuit Nunaanni qeqeetami Jersey-mi pisussami, angusarissaarnerunissaq kissaatigalugu, Timersoqatigiit Kattuffiat peqataasussanut kaammattuuteqarpoq.

Aamma atuaruk Kalaallit ajugaaniutivinnerni marlunni ajorsarput

- Piumasaqaataassaaq timersuutini peqataasussanit, nunani allanut unammisartut piareersarluarsimanissaat. Naatsorsuutigaarpummi nunanut allanut unammisartuutigut piareersarluarsimanissaat, Island Gamesertoqarnissaanut sungiusarnertik pimoorulluassagaat, Timersoqatigiit Kattuffiat tusagassiutinut nalunaarumminni allapput.

Ukioq ataaseq allortarlugu, Island Games ingerlanneqartarpoq, ukioq manna tamanna pissalluni aasaru juunip 27-anniit juulip pingajuat tikillugu.