Kalaallit ajugaaniutivinnerni marlunni ajorsarput

Kalaallit arnartaat angutitaallu Island Gamesertoqarnerani Bermudami ingerlanneqartumi ajugaaniutivinnermi ajorsarnermikkut sølvinnaannarnertik naammagiinnartariaqarpaat. Arnat strafferluni ajugaaniunnermi ajorsarput, angutillu unamminerup naajartornerani nalorninarsinnaasumik straffertitsisoqarneratigut ajorsarlutik.
Allattoq Peter Troelsen, Simon Uldum
juulip 19-at 2013 06:14

Bermudami unammeqqaarnernut naleqqiutissagaanni nunanut allanut unammisartut pitsanngoriaateqarfiupput, kuultinnannissaannulli ajoraluartumik naammanngilaq. Arnat sukataarlutik unammipput, unamminerli strafferluni ajugaaniunnikkut aalajangerneqartussanngormat unammiuaarnernik aaqqissiusunut 4-3-mik ajorsarlutik kuultinnanngitsoorput.

Angutit aamma arsarluarput unammisaminnullu tulluavissorlutik. Unamminerup immikkoortuata aappaata naalernerani straffertoqarnerani unammineq aalajangerneqarpoq. Angutit arsartartortavut dommerimit uukapaatitaasutut misigisimapput, Nunatsinnummi frisparkertoqaraangat siggarusuppallaarneq ajormat.

Nunanulli allanut unammisartut ujaminnassimallutik, sapinngisartillu tamaat Nunarput sinnerlugu unammiuaarnerni unammisimasutut misigisimallutik angerlarsinnaakutsoorput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq