Timersoqatigiit kattuffiat ammaaqqinnissamut qilanaartoq
Sulorarneq, nerrivimmi arsaararneq, tennisserneq pisissaarnerlu.
Kalaallit Nunaanni Timersoqatigiit Kattuffiat isumaqarpoq, timersuutinik taakkuninnga aallusseqqittoqarsinnaanngussasoq – nunatsinnimi timersortarfiit aqagu arfininngornermi ullaakkut nalunaaqutaq arfineq-pingasunut ammaqqissapput.
Nuup coronavirusip ajornartorsiortitsinerani matuneqarallarnera ilutigalugu nunatsinni timersortarfiit marsip ulluisa 18-ianni matuneqarallarput.
Timersoqatigiiffilli isikkamik arsaannermik, assammik arsarnermik timersuutilnillu allanik imminnut attuuffiusartunik aallussiffiusut aallartisaqqinngikkallassasut, Kalaallit Nunaanni Timesoqatigiit Kattuffiata inassutigaa. Timersoqatigiiffiit futsalernermik, volleyballernermik silamilu isikkamik arsaannermik aalluffiusut matumani aamma pineqarput.
Timersuutilli allat imminnut attuuffiusanngitsut soorlu yoga pisissaarnerlu - silami illullu iluani - maanna aallartisaqqittariaqartut, Kalaallit Nunaanni Timersoqatigiiffiit Kattuffiata inassutigaa.
AAMMA ATUARUK GIF sivitsuivoq: Apriilip naaneranut timersortoqassanngilaq
Timersuutit allat soorlu issittumi timersuutit taekwondolu aallartisaqqissinnaapput, kisianni imminnut attuuffioqqusaanatik. Timersuutit imminnut attuuffiusanngitsut aallartisaqqissinnaasutut Kalaallit Nunaanni Timersoqatigiit Kattuffianit nalilerneqarput - timersoqatigiiffiilli timersortartut imminnut attuunnissaat ingalassavaat.
Mianersornissarli pingaaruteqartuarsinnartoq, Kalaallit Nunaanni Timersoqatigiit Kattuffiat erseqqissaavoq. Oqartussat katerinnermi inuit amerlanerpaamik 100-uunissaannut imminnullu qanillattornaveersaarnermut maleruagassiaannik innersuussutaannillu malinninnissaq - atisanillu timersuutinik atukkersoqqaarluni timersoriartarnissaq timersoreeraannilu angerlarsimaffimmi uffartarnissaq, Kalaallit Nunaanni Timersoqatigiiffiit Kattuffiata inassutigaa.