Tillinniat inuusuttut tigusarineqartut

Niviarsiaqqat nukappissallu 13-22-nik ukiullit biilinik aallarussisimasutut ikinnerpaamillu angallammik ataatsimik aallarussisimasutut, kiisalu inuinnaat angerlarsimaffiinut angallatinullu tillinniarsimasutut pasineqarput. Nunatta Politiivini tusagassiinermut akisussaasoq, Henrik Madsen, KNR-imut taama oqarpoq.

- Sulianut atatillugu inuit sisamat politiinit tigusarineqarlutik killisiorneqarput. Taakku iperagaareerput politiillu paasiniaanertik suli ingerlappaat, Henrik Madsen KNR-imut oqarpoq, ilanngullugulu ilisimatitsissutigaa tigusarineqartut pisut ikinnerpaamik arfineq-pingasut pillugit pasineqartut, kiisalu tigusarineqartut sisamaasut ukiukitsuunngitsut.

Biilinik aserorterisoqartarnera Nuummi biiliutillit ajornartorsiutigaat. Pasineqarlutilli tigusarineqartut aamma biilinik aserorterisuunersut politiit oqaatigisinnaannginnerarpaat.

Innuttaasunit ikiorneqarnissaq pingaartoq

KNR innuttaasumit toqqissisimanngitsumit assinik nassinneqarpoq. Assini takuneqarsinnaapput inuusuttuaqqat Nuup ilaani Qinngutsinni biili iserfiginiarsarigaat.

- Ullaassaq tallimanut qiteqquttoq (marlunngormat ullaassakkut, aaqq.) Qinngutsinni Qungulermi aqqusinermit nipiliortoqarneranit itertinneqarpunga.

- Sunaaffa nukappiaqqat niviarsiaqqallu arlallit (15-16-it miss. ukiullit) najugaqartut biilii inissiap saavaniittut iserterfiginiarsarigaat, takunnittoq assinik KNR-imut marlunngormat nassiussisoq taama allappoq.

Assit taakkorpiaat iluaqutigalugit politiit pasisaminnik tigusarinnissimanersut Henrik Madsenip uppernarsarsinnaannginnerarpaa, oqarlunili innuttaasut saaffiginnittarnerat politiit nalinginnaasumik iluaqutigilluartaraat.

- Innuttaasunit ikiorneqarnissarput pisariaqarteqaarput. Taamaammat innuttaasut pasinarsinnaasunik takusaqarunik politiit erngerlutik, pisoqarneratalu nalaani, saaffigisassavaat, Nunatta Politiivini tusagassiinermut akisussaasoq, Henrik Madsen, taama oqarpoq.

Aamma atuaruk Unnuami tillinniat ajornartorsiutaasut