Tilliep Vittullu partiivi Inatsisartuni qinigaangitsoortut
Qinigaaffimmi politikkerit Inatsisartuni ataatsimiilerpata Nunatta Qitornai Sulisitsisullu peqataasanngillat.
Tassami Vittus Qujaukitsup Tillie Martinussenillu partiiaraasa Inatsisartunut isernissamut qinersisikippallaarput.
Vittus Qujaukitsoq 639-nik taagorneqarpoq. Qinersinerilli pingaaruteqartut marluk ingerlatillugit partiimut minnermut Nunatta Qitornaanut unammillernartuuvoq, taanna oqarpoq.
- Partiit qinersinermi uani isertitaqartut pilluaqqorusuppakka. Sulilluarnissaanillu kissaappakka. Qinersinermi inernerit takussagaanni ajuusaarutissaqanngilanga, KNR TV-mi partiit siuttuisa oqallinneranni, Vittus Qujaukitsoq, oqarpoq.
AAMMA ATUARUK Inuit Ataqatigiit Inatsisartunut qinersinermi ajugaasut
Sooruna Inatsisartuni qinerneqanngitsoortusi?
- Ullumi ataatsimi kommunimut Inatsisartunullu qinersisoqarpoq. Partiiaraavugut. Tamakku qinersinermi uani iluatitsinnginnitsinnut ilaatigut peqqutaasinnaapput. Qinigaaffimmi kingullermi akisussaafferujussuarmik nammataqarsimavugut.
Massakkullu suleriniarnerluni eqqarsaatiginiarpaa.
Tillie ilaqutamaarlunilu ikinngutimaarniartoq
Suleqatigiissitsisunut qinersisut 1,4 procentiupput. Partiimi siulittaasup ulapinnginnerulaalernissani qilanaaraa:
- Qinersinermi marlunnik isertitaqarnissaq isertitaqavinnginnissarluunniit neriiutigisimagipput oqaatigissavara. Eqqumiiginarsinnaavoq, Inatsisartunili issiagaanni naalakkersuisuutitaqarnanilu ilungersunarpoq.
- Ilaatigut ullaasakkut sisamanut sulillunga aallartikkuma aatsaat unnukkut qulinut soraarsinnaasarpunga, KNR TV-mi partiit siuttuisa oqallinneranni, Tillie Martinusen oqarpoq.
- Sulinngiffeqalaarnissara qilanaaraara, ilaqutamaarlungalu ikinngutimaasaanga.
Ukiassami partiimi aningaasanut attuumassuteqartunut isumaqatigiinngissutigineqartunut, Tillie Martinusen, oqaaseqarpoq.
AAMMA ATUARUK Suleqatigiissitsisuni upernaaq eqqissiviilliortoqareersoq: Partiimi nukiit politikkimut maanna atorneqassapput
Aningaasat partiimut attuumassuteqarnersut attuumassuteqannginnersulluunniit killisarititaasoq sumiineranut tunngavoq. Isumaqatigiinngissutaasoq partiimut arlalinnik kinguneqarnerlutitsivoq.
- Suliaq tamanna pillugu tusagassiortunit saassussilluni 27-riaq allaaserineqartarsimanitsinniit kinguneqarpoq, taanna oqarpoq.
Tillie Martinussenili massakkut sulerissava?
- Ilungersuuteqartarnitsituut ilungersuuteqartuassaagut, taanna oqarpoq.
- Sisamanik assigiinngitsunik suliffissanik neqeroorfigitereerpunga, sapaatit akunnerinilli sisamani sineqqaassagunarpunga ilaqutamaarlungalu.