Tillie Martinussen: Uloriarnartorsiortinneqarpunga

Suleqatigiisitsisut siulittaasorigallagaat Inatsisartunilu ilaasortatuaat Tillie Martinussen Inatsisartuni sooq sulinnginnerluni nassuiarpaa.

Oktobarip 21-anili taanna Inatsisartuni oqalliseqataasimanngitsoq Sermitsiaq.ag allappoq.

Tusagassiuutinut nalunaarummi siulersuisuunerit Tillie Martinussenip "uloriarnartorsiortinneqarneranik" tamanna pissuteqartoq allapput.

Suliaq ingerlammat, Tillie Martinussenip susoqarsimanersoq KNR-imut itisilerusunngilaa.

- Uannut, siulersuisuunernut, sulisutsinnut partiimullu attuumassuteqartunut ulorianartutut nalilerneqarsinnaasunik pisoqartarsimavoq, tusagassiuutinut nalunaarummi Tillie Martinussen allappoq, nangipporlu:

- Isumannaatsuunerma qularutigiunnarnissaata tungaanut ininnit anisinnaanera killilersimaaqqagallassaginga partii peqatigalugu aalajangerparput.

Pinerluttoqartoq

Tillie Martinussenip sulinngiffeqarnini Inatsisartut Siulittaasoqarfiannut nalunaartutigisimagitsik tusagassiuutinut nalunaarummi ilanngullugu paasissutissiissutigaat.

Tillie Martinussen ulorianartorsiortinneqarsimanersoq paasitinneqarsimanatik Inatsisartut Siulittaasuat Vivian Motzfeldt (S) KNR-imut paasissutissiivoq.

AAMMA ATUARUK Nuunneq, sapigaqarneq uippakajaarnermullu ikiorneqarneq: Suleqatigiisitsisut uku avissaartuussutigaat

Pinerliisut eqqartuussivilersuunneqassasut tusagassiuutinut nalunaarummi ilanngullugu paasissutissiissutigineqarpoq.

Susoqarsimanersorli itisilerneqanngilaq. Pisorlu politiinut unnerluutigineqarnersoq partiimit aamma uppernarsarneqarumanngilaq.

Tillie Martinussen Inatsisartunut suliartoqqingajalerluni taassuma partiini peqatigalugu nalilerpaat.

Qaquguli tamanna pissanersoq nalunaarutigineqanngilaq. Tillie Martinussenillu sulinnginnerani sinniisua aggersarneqassanersoq aamma paasissutissiissutigineqanngilaq.

Partii assoralisimaartoq

Inatsisartut ukiaanerani suli ataatsimiipput, oqaluuserisassalli sisamat pilersaarummit peerneqarput. Taakku Tillie Martinussenip siunnersuutigai, tamarmillu ippassaq marlunngornermi tunuartinneqarput.

AAMMA ATUARUK Tillie Martinussenip atornerluinerarneqarnini saassussinerlunnertut nalileraa

Suleqatigiisitsisut partiimut tapiissutinik atuinerat piffissami kingullermi oqallisigineqarpoq.

Siulittaasuugallartup Tillie Martinussenip nammineq akiligassani partiip akilertarsimagai partiip naatsorsuuserisorisimasaata siulersuisuunernilu ilaasortaanikup isornartorsiorpaa.

Taamaattoqarneraaneq siulersuisuunerit Tillie Martinussenillu ilumuunnginnerarpaat.