Ministerip kalaallit juullimut tunissutissaqarunnaarsikkaa
Isertitsivinni ilaqutaqarnani ikinnguteqarnanilu juullisiornissaq aliasunnarsinnaallunilu kiserliornarsinnaavoq. Maannalu ersarinnerulerpoq Nunatsinni isertitsivinni nalliuttorsiorneq suli qaamaninnguaarunnerusinnaallunilu tunissutissarsiffiujunnaarsinnaasoq.
Nuummi isertitsivimmi nalliuttorsiorneq 2016-imi qaamaninnguartaqarpoq. Pineqaatissinneqarsimasut ukiup ingerlanerani ningittagalerinerat ingerlalluarmat 130 koruunip nalinganut juullimut tunissutissamik tunineqarput.
2017-imili taamaalortoqarnavianngitsoq, Nunatsinni pinerluttunik isumaginnittoqarfimmi pisortaq, Naaja H. Nathanielsen KNR-imut akissuteqarluni allappoq.
Enner Mark Fængselimi Jyllandimi Horsenimiittumit juullimut oqaluttuaq alianartoq tamatumunnga pissutaavoq. Parnaarussivimmi tassani pineqaatissinneqarsimasut 100 koruunimik naleqartumik tunineqarput. Aningaasat katillugit 23.500 koruuniupput. Illuatungaanili parsaarussivimmi sulisut tunineqanngillat.
Tamannalu Søren Pape Poulsenip (K) akuerinngilluinnarpaa.
- Paasinnittariiasera naapertorlugu pinerlussimanertik peqqutigalugu parnaarussaanissaminnik pineqaatissinneqarsimasut naalagaaffiup akiligaanik juullimut tunineqartarnerat isumassaqanngilaq, Søren Pape Folketingip eqqartuussivimmut ataatsimiititaliaanut allattoq TV2-p allaatigaa.
Tamannalu Nunatsinni pineqaatissinneqarsimasunut inissiisarfimmiittunut aamma kinguneqassaaq. Pinerluttunimmi isumaginnittoqarfik danskit naalagaaffianniippoq, taamaalillunilu danskit malittarisassaat atuupput.
Nunatsinni pinerluttunik isumaginnittoqarfiup pineqaatissinneqarsimasunut 56-iusunut juullimut tunissutissaqarnermi aningaasat 7280 koruunit atorpaat. Taakku saniatigut 4400 koruunit juullimut nerisassarsiutigineqarlutik.
Inatsiseqarnermut ministerip malittarissat nutaat Nunatsinni pineqaatissinneqarsimasunut tigummigallagassanngortinneqarsimasunullu aamma eqquissasut ilisimaneraa ilisimaneqanngilaq.
