Tiilerilaami Isertumilu attaveqaatit tamarmik ajortut
Tusassip tunumi attaveqaataa Tiilerilaap kangerluaniittoq ajortoq Tusassip KNR-imut ilisimatitsissutigaa.
Tunumi Tusassip sakkortusaavia Kap Tycho Brahe ajoquteqarmat Tiilerilaami Isertumilu mobiilinut, oqarasuaatinut, tv-nut, radionut, VHF radiomilu kanal 16 aamma 27 tamarmik attaveqanngillat.
Tasiilami eqqaanilu sakkortuumik sapaatit akunnerata naanerani piteraqqammerpoq. Tamannali peqqutaanersoq Tusassimit suli akineqarsinnaanngikkallarpoq.
- Teknikerigut sumiiffimmukarlutik misissueqqaartinnagit oqaatigisinnaanngilarput suna pillugu attaveqaatigu ajortissimanersut, Tusassimi attaveqaqatigiinnermut immikkoortortaqarfimmi sulisoq, Pipaluk Egede Poulsen oqarpoq.
Ajoqutaasut Tusassimit ualimut misissorneqassapput, teknikerit Tasiilamiit 14:30 aallarnissaat naatsorsuutigineqarpoq.
- Nunarput tamakkerlugu atuisutta internettimut, oqarasuaatinullu attaveqarnissaat pingaartikkatsigu taamaammat piaarnerpaaq atorlugu teknikerimik aallartitsiniarsarivugut silali suli naalagaammat suli aallartoqanngikkallarpoq, Tusass ilisimatitsivoq.
