Tiilerilaami Isertumilu attaveqaatit tamarmik ajortut

Tunumi nunaqarfinni Isertumi Tiilerilaamilu sunut tamanut attaveqaataat ajorpoq, Tusass taama paasissutissiivoq. Piterarli peqqutaanersoq suli ilisimaneqanngilaq.
Tunumi Tusassip sakkortusaavia Kap Tycho Brahe ajoquteqarmat Tiilerilaami Isertumilu mobiilinut, oqarasuaatinut, tv-nut, radionut, VHF radiomilu kanal 16 aamma 27 tamarmik attaveqanngillat. Assi © : Mads Pihl/Visit Greenland
Allattoq Marie Kûitse Kristensen
septembarip 26-at 2022 12:08

Tusassip tunumi attaveqaataa Tiilerilaap kangerluaniittoq ajortoq Tusassip KNR-imut ilisimatitsissutigaa.

Tunumi Tusassip sakkortusaavia Kap Tycho Brahe ajoquteqarmat Tiilerilaami Isertumilu mobiilinut, oqarasuaatinut, tv-nut, radionut, VHF radiomilu kanal 16 aamma 27 tamarmik attaveqanngillat.

Tasiilami eqqaanilu sakkortuumik sapaatit akunnerata naanerani piteraqqammerpoq. Tamannali peqqutaanersoq Tusassimit suli akineqarsinnaanngikkallarpoq.

- Teknikerigut sumiiffimmukarlutik misissueqqaartinnagit oqaatigisinnaanngilarput suna pillugu attaveqaatigu ajortissimanersut, Tusassimi attaveqaqatigiinnermut immikkoortortaqarfimmi sulisoq, Pipaluk Egede Poulsen oqarpoq.

Ajoqutaasut Tusassimit ualimut misissorneqassapput, teknikerit Tasiilamiit 14:30 aallarnissaat naatsorsuutigineqarpoq.

- Nunarput tamakkerlugu atuisutta internettimut, oqarasuaatinullu attaveqarnissaat pingaartikkatsigu taamaammat piaarnerpaaq atorlugu teknikerimik aallartitsiniarsarivugut silali suli naalagaammat suli aallartoqanngikkallarpoq, Tusass ilisimatitsivoq.

Aamma atuaruk