Thule Air Base kalaallisut ateqalerpoq
Amerikamiut Pituffimmi sakkutooqarfiat Thule Air Base, Pituffik Space Base-mik ateqalerpoq
Sakkutooqarfiup atiata allanngortinneqarnera amerikamiut sakkutooqarfianni malunnartinneqarpoq , politikerit kalaallit danskillu kiisalu amerikamiut sakkutuui qaffasissumik inissisimasut peqataallutik
Peqataasunut ilaapput Nunanut allanut tunngasunut Naalakkersuisoq Vivian Motzfeldt aamma USA-p Danmarkimi aallartitaa Alan Leventhal. Danskit illersornissamut ministererigallagaat Troels Lund Poulsen Venstreneersoq videokkut isiginnaarutikkut malinnaatinneqassaaq.
Sakkutooqarfiup atiata allanngortinneqarnerata malunnartinneqarnerani politikerit oqalugiarput.
Malunnartitsinermi oqariartuutigineqartup pingaarnersaraa sakkutooqarfiup amerikamiut illersornissaqarfiannut pingaaruteqassusiata ersarissarneqarnissaa.
Pinngitsaalisamik nuutitsisoqarsimanera eqqaaiarneqartoq
Sakkutooqarfiup nutaamik ateqalernerata malunnartinneqarnera minutsinik ataatsimik nipaallisimaneranik aallartinneqarpoq.
Tamanna innuttaasunut sakkutooqarfiliorniarnermi pinngitsaalisamik nuutsinneqartunut ataqqinninniarluni nipaallisimasoqarpoq.
Sakkutooqarfiup Pituffik Space Basemik ateqalerneranut atatillugu malunnartitsisoqarmat KNR najuuppoq.
Amerikamiut sakkutooqarfiat Thule Air Base 1953-mi pilersinneqarpoq ateqartinneqarluni “Operation Jay “ .
Pinngitsaalisamik nuutsitaasut
Maajip qaammataani 1953-mi sakkutooqarfiliortoqarmat Uummannami innuttaasut 116-it pinngitsaalisaallutik Qaanaamut nuutsinneqarput, taamanikkut Kalaallit Nunaat danskinit nunasiaatigineqarpoq. Qaammat ataaseq qaangiummat Kalaallit Nunaat nunasiaataajunnaarpoq.
Pinngitsaalisamik nuutitsineq taamanikkut Grønlandsdepartmentimit oqaatigineqarpoq “Nammineq piumassutsiminnik nuunnertut “. Nuutsinneqarnerannut periuserineqartut inatsisilerinermik suliaqartut 1980-mi isornartorsiorpaat
1996-mi peqatigiiffik Hingitaq aallartinneqarpoq, nuutsitaasimasut naalagaaffimmit taarsiiffigitinnissamik suliniuteqartoq. Suliaq aalajangiiffigineqarmat, pinngitsaalisamik nuutsinneqartut 500.000 kr-nik taarsiiffigineqarput danskillu naalagaaffiannit utoqatserfigineqarlutik.
