Thatcherimik aamma iluarinninngitsoqarsimavoq
Naak Argentinap Falklandip Qeqertai tulunnut annaammatigit, kisermaassilluni naalakkersuisuusoq aamma uppititaangaluartoq Margaret Thatcherip atia misigissutsinik kissartunik pilersitsinngilaq.
Thatcherimi eqqaamavaat tuluit aqqartartuutaata argentinamiut sorsuutaannik Belgranomik qaartartumeerlugu kivisistinissaanut akuersisimasutut. Naak sorsuut tulunnik ulorianartorsiortitsinngikkaluartoq, sorsuffimmiillu ungasissumiikkaluartoq.
Taamani Argentinamiut umiartortut inuusuttut 323-it ajunaarput.
Afrikami Kujallermi ukiorpassuarni ammip qalipaataanik immikkoortitsillutik naalakkersuisunik tapersersuisutut Thatcher eqqaamaneqarpoq, nunallu allat aqutsisunut taakkununnga akerliullutik niuvernikkut mattussisarnerinut akerlilersuisutut, aammalu Nelson Mandelamik suliniaqatigiiffimmillu ANC-mik peqqarniisaarniatut taaguisarsimasutut eqqaamaneqarpoq.
Afrikaop Kujalliup præsidentiata Zumap ANC-lu Thatcherip toqunera ullumi annikittuinnarmik eqqaavaat.
Tusagassiortorli sydafrikamiu ullumi facebook-imi allappoq: Mandela Thatcherimit sivisunerusumik inuuvoq. Kiffaanngissuseqarnermut 1-0!
Aammattaaq Chilemi Thatcher kisermaassilluni naalakkersuisuusimasumut Pinochetsimut tapersersuisutut eqqaamaneqarpoq. Taanna Spaniami eqqartuunneqartussaalluni Londonimi toqqoqqanerani tapersersorsimavaa. Chilemi sakkutuut naalakkersuisuuneranni nunarsuarmiunut pinerluttuliorsimasutut Pinochet Spaniamiut eqqartuukkusussimagaluarpaat.
Taamani Thatcherip tv-kkut oqalugiarluni Pinochet demokratimik Chilemi eqqussisimasut eqqartorpaa, naak aassunneqisumik 1973-imi naalakkersuisunik uppisitsisimagaluartoq.
Tamakkuupput Latinamerikami Thatcherip eqqaamaneqaatissai.
