VIDEO Thailandimeersoq nunatsinni angerlarsimasutut misigisimasoq
Nunatsinni ukiorpassuit najugaqarnikuunera peqqutaalluni angerlarsimasutut misigivoq.
Ulai meeraanerminiilli tagiartuisarpoq, ilaqutaalu Thailandimi tagiartuisarfeqarput. Taamaasillunilu tagiartuisartutut Thailandimi Danmarkimilu ilinniarsimalluni.
Nuummi siona januaarimi tagiartuisarfittaarpoq pimooruteqalugulu.
- Nalinginnaassumik sulisarpunga arfineq pingasuniit unnukkut arfineq pingasut tungaannut, kisianni ullaakkut arfinerniit unnukkut aqqarngup tungaanut ilaanni sulisinnaasarpunga, Ulai KNR-imut oqarpoq.
Thailandimiuunini pillugu nuanninngitsumik pineqartarnersoq aperiganni ima akivoq.
- Misigisimanngilanga ajorineqartarlunga, taamaammat Nuummi tikilluaqqusaasutut misigaanga, Ulai oqarpoq.
Ulai Nuummi qatannguteqarpoq, ilaqutaali aamma allat ikinngillat.
- Nuummi ilaqutaqarpunga, 1994-imili Nuummut nuuppugut. Ilaquttavut ilai uternikuupput, kisiat maaniinnerput nuannaringaaratsigu ilaquttagut Thailandimiit tikereranikuupput. Taamaammat ilaqutariilluta 20-it missaanniippugut maaniittut, Ulai oqarpoq.
Nuna inunngorfigisani ornikkaangamiuk, nunatsinnut angerlarsertutut misigisarpoq.
- Kalaallit Nunaat qimalaarsimagaangakku angerlarsertaqaanga, aamma Thailand uannut kiappallaalernikuuvoq.