Teslami piginneqataassutit nalikilleriapiloortut
Amerikami innaallagiatortunik biililiorfissuup Teslap, Elon Muskimit pigineqartup piginneqataassusaasa nalingi New Yorkimi niuffaffimmi 8 procentinik marlunngornermi appariarput.
Biilinik Teslameersunik Europami tunisaqartarnerup appariartuinnarnera pissutaaqataavoq.
Teslamit biilit Europa tamakkerlugu 10.000-nit ikinnerusut qaammatip siuliani tunineqarput, siorna piffissap taamaalineranut naleqqiullugu 45 procentinik ikinnerullutik.
Teslap pisortaanera aningaassaatilissuaq Elon Musk USA-mi politikkimut qaammatini kingullerni pulajartuinnavippoq.
Donald Trumpip qineqqusaarneranut aningaasarpassuarnik ilaatigut tunissuteqarnikuuvoq. USA-p aningaasarsiornerani sipaarniuteqarfigineqarnissaa pillugu naalakkersuisoqarfimmik nutaamik Trump pilersitsimmat Musk tassani aqutsisuulerpoq.
Muskip Europami partiinut talerperliunianut piffissami kingullermi tapersersuinini aamma saqqummiuttarsimavaa, assersuutigalugu Tysklandimi partii talerperliuniamut AfD-mut (Alternative für Deutschlandimut) Tysklandimi inatsisartunut sapaatiummat qinersisoqarnissaanut tapersersuinini saqqummiullugu.
