Telepostip kilisaataatileqatigiiffik taarseeqqullugu eqqartuussivilersuukkaa
Kilisaatip raajarniutip immap naqqatigut kabeli 2019-imi januaarip ulluisa 21-anni aqqutalugimmagu Maniitsup avannaaniit Aasianniittut internetimut attaveqarnerat kipiluttunarsivoq.
Telepost, Ilulissani kilisaataatileqatigiiffimmit 9,3 millionit koruuninik suliamullu aningaasartuutiminut taarsiivigeqqulluni eqqartuussivilersuisoq, taama ilisimatitsivoq.
Tamanna Kalaallit Nunaanni Eqqartuussiviup aggeqqusissutaani KNR-ip pissarsiarisaani allassimavoq.
15 millionit koruunit sinnerlugit annaasaqartoq
Immap naqqatigut kabelimik iluarsiineq 15,4 millionit koruuninik akeqartoq, Telepostip aggeqqusissutaani allassimavoq. Telepostili eqqartuussivilersuinermini kilisaataatileqatigiiffimmit tamakkiisumik taarsiivigeqquneqarsinnaanngilaq.
kilisaataatileqatigiiffiimmi ajutoornikkut aserugaqaraangamik tamakkiisumik taarsiinissamut angallannermut inatsimmit illersugaapput.
Taarsiivigeqqunermi aningaasat taarsiissutigeqqusat umiarsuup angissusia tunngavigalugu aalajangerneqartarput, Telepostilu tamatumani 9,3 millionit koruuninik taarsiivigeqqusinnaasoq Telepostip eqqartuussissuserisua isumaqarpoq.
AAMMA ATUARUK Telepost imaatigut kabelip kittorarneranut atatillugu kilisaammit taarsissuteqartitsiniartoq
Sisimiuniit 25 kilometerit missaattut kujasitsigisumiittumi immap naqqatigut kabeliliisoqareersorlu taanna qaammatit qulit qaangiummata aqqutalugineqarpoq.
Immap naqqatigut kabeliliisoqariitsiartoq taanna sumiinnersoq aalisartunit piniartunillu takuneqarsinnaaqqullugu Telepost naapertorlugu immap assinganut nalunaarsorneqarpoq.
- Taamaammat immap naqqatigut kabeli umiarsuarnit taassuma eqqaatigoortunit qaqugukkulluunniit takuneqarsinnaavoq, Telepost aggeqqusissummi allappoq.
Immap naqqatigut kabeli taanna 200 300-llu akornanni ititigisumiippoq, taannalu
aqqutalugeqqunagu qanittuani soorlu kilisattoqaqqusaannginneranut nalunaaqutsersuisoqarnikuuvoq.
Kilisaalli raajarniut alaatsinaassimanngitsoq Telepost isumaqarpoq, taamaammallu taarsiivigeqqusinnaalluni isumarpoq.
Qalukuusorisimagaat
Kilisaammi raajarniummi inuttat marluk Telepostip Sisimiuni immikkoortortaqarfianut immap naqqatigut kabelip aqqutalugineqarnerata aqaguani saaffiginnissimasut, Telepost aggeqqusissummini allappoq.
Saaffiginnittut aappaat kilisaatip naalagaraa, immallu naqqatigut kabelip eqqaatigoorsimallutik taanna nassuiaavoq.
AAMMA ATUARUK Immap naqqatigut kabeli umiarsuit qaqutikkut qanillivallaartarpaat
Immallu naqqatigut raajarniarlutik kilisannerminni aqqutalugaqarsimallutik immalli naqqani aqqutalugisartik inuttat qalukuusorisimagaat, taanna aamma oqarpoq.
Telepost tamatuma kingorna aseruatiternernik immikkut paasisimasalissarsivoq. Immap naqqatigut kabeli kilisaatip qaluata saarlisaartuisa natersiutaasut akkersimasinnaagaat, taassuma uppernarsarpaa.
Aammali kabeli amuneqarluni inuttat ilaanit sakkumik suugaluarnersumik kipineqarsimasinnaasoq, taassuma aamma nalilerpaa.
Kilisaataatileqatigiiffiup oqaaserisat ilumuunnginnerarai
Kilisaammi inuttat immap naqqatigut kabelip kittorarneranut Telepost naapertorlugu pisuusutut nassuikannerneranniit ullualuit qaangiummata, Telepostip eqqartuussissuserisuata kilisaataatileqatigiiffik aningaasat taarsiissutissai pillugit attavigaa, kilisaataatileqatigiiffiulli pisortaata umiarsuaatimik arlaannaalluunniit kabelip kittorarneranut pisuusimanissaa akerlilerluinnarpaa.
KNR-ip kilisaataatileqatigiiffiup suliamut isumaanik tusarniaraluarpaa, tassanili pisortaq piginneqatigiifiup eqqartuussissusilerisuanut innersuussivoq.
Eqqartuussissusilerisoq KNR-ip saaffiginnissutaanut akinngilaq.
Taarsiissuteqarnissamik suliaq Kalaallit Nunaanni Eqqartuussivimmi suliarineqassaaq, taassumali aallartinnissaa suli ullulerneqarani.
Immap naqqatigut kabelip ajoqusernera taanna ajoqusernerit 2019-ip naanerani qaammatit pingasut ingerlaneranni pingasuusut ilagaat. Taakkuninnga iluarsiineq 71,6 millionit koruuninik akeqarpoq.
