Aasiaat Radioa: Immap naqqatigut kabeli umiarsuit qaqutikkut qanillivallaartarpaat
Aasiaat Radiuata immap naqqatigut kabeli qanillineqartillugu angallatinut mianersoqqusillutik kalerriisarput.
- Qanillattorneqartarpoq. Qanillattorneqakulasutulli oqaatigineqarsinnaanngilaq, pissutigalugu angallatit raajarniutillu massakkut amerlanerpaat immap naqqatigut kabelip sumiiffii pigerrakkamikkit, Aasiaat Radioni ningiu Nanna Sandgreen oqarpoq.
Sisimiunit 30 kilometerisut kujasitsigisumi kabeli kilisaammit aqqutalugineqarluni ajoquserneqarmat januaarip 21-anili atorsinnaajunnaarpoq. Pisumullu tunngatillugu Aasiaat Radioni oqaaseqartoqarsinnaanngilaq, angallatinilli qanillattortoqartillugu qanoq periuseqarnertik paasissutissiissutigaat.
AAMMA ATUARUK Kilisaatip immap naqqatigut kabeli ajoquseraa: Eqqartuussissuserisup suliaq misissuiffigaa
- Angallatit immaqaluunniit kilisaatit qanillivallaaraangata 200 meterit angullugit ungasitsigileraangata radiukkut attavigisarpagut mianersoqqullugit nalunaarfigalugit immap naqqatigut kabeli qanillivallaaraat, Nanna Sandgreen oqarpoq, angallatillu kalerrisaarneqartut paasinnikkaangamik allamut sangusarnerarlugit.
- Taanna maassakkut ajornartorsiutitut oqaatigineqarsinnaanngilaq. Kingullertigut radiukkut attaveqarsimagutta akiuaannarput. Nalaarsiuittorujuuvugut pissarsiariuminnaattunik, Nanna Sandgreen oqarpoq.
Marsip qiteqqunnerani immap naqqatigut kabeli iluarsineqassasoq Tele-Postip naatsorsuutigaa.
AAMMA ATUARUK Tele-Post eqqunngitsuliorfigineqartoq