Telepost imaatigut kabelip kittorarneranut atatillugu kilisaammit taarsissuteqartitsiniartoq
Telepost siorna ukiup nikinnerani imaatigut kabelip kimmut sineriammi kujataani Qaqortumit avannaanut Aasiannut assigiinngitsunik pingasunik kittorarneranik eqqugaangaatsiarpoq.
Kittorarnerit pingasut katillugit 71,6 millionit koruuninik naleqarput, tamanna Telepostip aningaasaqarneranut ilanngaangaatsiarpoq.
Telepostilli aningaasartuutigisat ilaat tigoqqissinnaassallugit neriuutigaa, suliffeqarfiummi kabelip kittorarnera ataaseq kilisaammit kittorarneqarsimasoraa. Telepostip oqarnera naapertorlugu kabeli kilisaatip qassutaanit aqqusaartilluni kittorarpoq.
Imaatigut kabelimit 200 meterimik ungasissuseqartumi kilisannissaq inerteqqutaavoq, kilisaatillu tamanna malissimanngikkaa Telepost isumaqarpoq. Taamaammat Telepostip kilisaat aningaasanik suli qassiuneranik ilisimaneqanngitsumik akiliisinniarlugu eqqartuutitinniarpaa.
Tamanna Telepostip KNR-imut uppernarsarpaa. Suliffeqarfilli taarsiititsiniarnermut suliaq pillugu oqaaseqarusunngilaq, matumani eqqartuussiviit suliamik suliaqarnissaat utaqqinera pissutaavoq.
Qaammatini pingasuni kittorarnerit pingasut
Imaatigut kabelip ajornartorsiortitsinera nunatta kujasissortaani Qaqortumit Nuummut attaviup aserorneranit decembarip ulluisa 27-anni aallartippoq.
Qaqortumit Nuummut imaatigut kabeli sillimmatitut attaviuinnaraluarpoq, taanna Canadamut attaviup pingaarnerup attaveerunnerani atorneqarsinnaasuuvoq.
Attaviulli pingaarnerup Canadami iluarsaassisoqarnera pissutigalugu qasseeriarluni attaveerummat innuttaasut imaatigut kabelimut attaveqaammut qasseeriarlutik attaveerupput, radiokædekkullu attavimmik arrinnerusumik atuisoqartariaqarluni.
Radiokædemut attaveqaatit sinerammi atassuteqartuupput, taakkuli attaveqatigiinnerit imaatigut kabelip atorneranitulli sukkatigisinnaanngillat.
AAMMA ATUARUK Internetimut attaveeruttoortoqaqqinnginnissaa Tele-Postip neriuutigaa
Naak ukioq ataaseq affaalu qaangiutereeraluartut kabelillu pingasut kittorartut siullersarigaluaraat tamanna sumik pissuteqarnersoq Telepostip ilisimanngilaa.
Telepostip attaviup iluarsartuunniarneranut qaammatit arfineq-pingasut atorpai, piffissamilu tassani imaatigut kabeli allani marlunni aamma kittorarpoq.
Siullermik januaarip ulluisa 21-anni Sisimiut kujataani, taannalu kilisaatip kittorarsimassagaa Telepostip ilimagaa. Attaviup kittorarneqarnerani Maniitsup avannaaniittut tamarmik imaatigut kabelimut attaveerupput.
Suliffeqarfiulli attaviup marsip qaammataani iluarsaanneqareerluni aaqqinnissaa naatsorsuutigigaluarpaa, Telepostilli allami aamma kittorarneqartoq paasivaa: Tamatumuuna Sisimiut avannaani, tassanilu kabelip iluliamit kittorarneqarsimassasoraa.
AAMMA ATUARUK Immap naqqatigut kabelip allatigut kittorarsimanera paasineqartoq
Attaviup Sisimiut eqqaani sumiiffinni marlunni ajornera pissutigalugu innuttaasut qaammatini pingasuni affarmilu radiokædemut taamaallaat attaveqarsinnaapput.
