Internetimut attaveeruttoortoqaqqinnginnissaa Tele-Postip neriuutigaa
![](/sites/default/files/styles/image_934x467/public/article_images/teles_bygning_nuuk_630_3_0_1_0.jpg?itok=uk867aS-)
Internetikkut attaveqaatit ajornerat, piggartuujugaanni, itiaartartuugaanniluunniit ulluni kingullerni maluginiarneqarsimassagunarpoq. Tele-Postimmi Canadami suleqataata immap naqqatigut kabeli iluarsartuunnikuummagu.
Internetikkullu attaveeruttoortoqaqqinnginnissaa Tele-Postip neriuutigaa:
- Internetikkut sapaatip-akunnerini tulliuttuni attaveeruttoortoqannginnissaa neriuutigaarput, Teknikkikkut qarasaasialerinermullu Tele-Postimi pisortaq Jonas Hasselriis oqarpoq.
AAMMA ATUARUK Kilisaatip immap naqqatigut kabeli ajoquseraa: Eqqartuussissuserisup suliaq misissuiffigaa
Internetikkut attaveqaatit sapaatip-akunnerata massuma ingerlanerani unnuakkut qaminneqartarsimapput, atuisunut sapinngisamik kinguneqapiluppallaannginnissaa neriuutigineqarluni, Tele-Postillu suleqatini oqaloqatigilluarpaa:
- Suleqaterput oqaloqatigilluartarparput, internetilli sapaatip-akunnerata ataatsip iluani sisamariarluni kipineqartarsimanera akueriuminaappoq, pingaartumik sivikitsumik piffissalerlugu piffissami kingullermi kalerriutigineqartarnera, Jonas Hasselriis oqarpoq.
AAMMA ATUARUK Kabelimi kittorarnerit akikilliliinissanik kigaallatsitsissagunartut
Immap naqqatigut kabelit sumiiffinni assigiinngitsuni ajornartoorfigineqarnerat pissutaalluni Tele-Post piffissami kingullermi unammilligassaqarpoq.
Aserfallatsaaliiniarluni iluarsartuussinerit atuisunut annerusumik sunniuteqannginnissaat sulissutigineqaraluartoq ajornartorsiortoqarsinnaasarpoq, Tele-Postillu Canadami suleqatini tamanna pillugu ilisimatittarpaa tamanna nunatsinnut ajornartorsiutaasoq. Tele-Post taama ilisimatitsivoq.