Telepost umiarsuarmik aaqqissuiartortussamik suli nassaanngitsoq

Tele-Postip avammut tusagassiisartua Paarnaq Hansen, KNR-imut taama ilisimatitsivoq.

- Naatsumik oqaatigalugu: Naagga, umiarsuarmik immap naqqatigut kabelimik iluarsaassisinnaasumik suli nassaanngilagut. Naleqqunnerpaamilli umiarsuulisoqarnissaa sulissutigaarput, Paarnaq Hansen KNR-imut emailikkut taama ilaatigut allaaserisaqarpoq.

Nunatta kujataani Islandillu akornanni kabelip ajoqusersimanera, decembarip ulluisa 27-anni ullaakkut paasineqarpoq. Kabeli 3 kilometeritut ititigisumi, Nuullu kujataatungaaniit 625 kilometerinik ungasitsigisumiilluni. Tamatuma kingunerisaanik internetimik atuisut eqqorneqarput, pingaartumik Kujataani atuisunut interneti kigaannerulerluni.

AAMMA ATUARUK Islandimut imaatigut kabelip attavia ajoquteqartoq

Qaqortup Nuullu akornanni radiokædep pisarnermit atorneqarnerulernerata kingunerisaanik internetip kigaannerulernera teknikerinit aaqqinniarneqaleruttortoq, Paarnaq Hansenip ilisimatitsissutigaa:

- Assersuutigalugu Nuummi atuisut Nuummut radiokæde aqqutigalugu internetimik nalinginnaasumik sukkassusilimmik atuisinnaapput, taanna oqarpoq.

Nanoq Mediap internettimik atuisui eqqorneqarput, taakkumi attaveqanngillat.
Attavik taanna Islandimeerpoq taamaasillunilu imaatigut kabelimut avannaaneersumut attaveqartussanngorlugu allanngortinneqarsinnaanngilaq.

Nanoq Medialli ajornartorsiutai aamma aaqqiiviginiarneqartut Tele-Post oqarpoq:

- Pilersuisorput aqqutigalugu Canadamut attaveqaataagallartussamik pilersitsivugut. Matumanili suleqatigineqartussat arlaliummata imaaliallaannaq pilersuilersinnaanngikkallarpugut, Tele-Postip tusagassiisartua Paarnaq Hansen oqarpoq.

AAMMA ATUARUK Atuisut naammagittassapput