Tele-Postimit akit nutaat
Nioqqutinut annertuukkuutaarlugit nioqqutigineqartunut tuneqqinneqarsinnaasutullu taagorneqartut itinerusumik, tassa akinik aaliangersimasunik Telep pisortaanerigallagaa, Søren Lennert Mortensen tunniussaqarsinnaanngilaq.
- Telemi ingerlatsisut nutaat internetiminnut katiterinissaannut, Telekkut sullississutaani assigiinngitsorpassuarni annerusumik akinik katalogiliornikuuvugut, pisortaanerungallartoq taama oqaluttuarpoq nangillunilu oqaatigaa, atlantikoq qulaallugu attaveqaateqarnermi akit appassapput, nunattali iluani attaveqarneq akisunerulissalluni.
Aamma atuaruk Tele-Post: Internettikkut namminersortunngorsaanermi akit piareerput
- Nioqqutit annertuukkuutaartut akit ilaat appassapput ilaallu qaffassallutik. Assersuutigalugu immap naqqatigut kabeli atlantikukkoortumi akeq appassaaq, LANLINK-ilu nunatsinni kabelinut aki qaffassalluni.
Telep sullississutaani namminersortunngorsaanermi atuisut attaveqaatinut niuertarfiit ilaanni akiliisarnerat appassanersoq Søren Lennert Mortensenip oqaaseqarfigisinnaanngilaa:
- Siunissami internetsit tuniniakkat qanoq katiterneqarsimaneri apeqqutaassapput, atuisut tuniniakkanut qanoq akiliisarnissaannut. Aammalu tuniniaasut akit suut atorusunneraat apeqqutaassaaq, Tele-Postip pisortaanerigallagaa, Søren Lennert Mortensen taama nalunaarpoq.
Aamma atuaruk Tele-Post: Internetti nunani allanitut akeqalersinnaanngilaq