Tele-post ukiuni aggersuni aningaasaleersuarniartoq
Nunatsinni internetti tamanut atoruminarneruleriartormat tamatuminnga ukiuni kingullerni atuinerungaluttuinnarpugut.
Taama ineriartorneq qaqugumut nangissasoq, Tele-Postimi pisortaq, Kristian Reinert Davidsen isumaqarpoq.
- Internetti amerlasuunut pigerusutaannaajunnaarluni pisariaqartunngorsimavoq. Ukiut tallimat matuma siorna tamarmiunngitsut internetteqarput, ullumikkulli tamarmik peqarput. Suliffeqarfinnimi pisariaqavippoq, inuillu ataasiakkaat aamma atorfissaqartillugu. Pisisartuttalu internettimut attaveqaat pitsaanerujartuinnartoq aalaakkaanerusorlu pisariaqartippaat, taanna nassuiaavoq.
AAMMA ATUARUK Telepostip kilisaataatileqatigiiffik taarseeqqullugu eqqartuussivilersuukkaa
Assersuutit ilagaat, internettimut attaveqaat atorlugu tv-kkut kanaalit filmillu, spillit qarasaasiakkullu pinnguaatit, soorlu playstationit, atorneqaleraluttuinnarput. Takornariartitsisartullu internetti ussassaarutinut inniminniiffissanullu atortarpaat. Umiatsiaararsortut aamma Royal Greenlandimut tunisinerminni qarasaasiat atorneruleriartorpaat.
- Internettikkut attaveqaatigut amerlasuut kabelikkut ataasiinnakkut attaveqaateqarput, taannalu ajortippat attaveqaatit kipissapput. Imaatigut kabeli 2019-imimi sumiiffinni pingasuni kipineqarmat kingunera tamatta eqqaamavarput, Kistian Reinert Davidsen oqarpoq.
Kipisoorneq ajoqutaasassanngitsoq
Attaveerunneq Sisimiuni kujasinnerusortaanilu akornutaanerpavoq, suliffeqarfiimmi inuillu attaveqaataat qaammatini arlalinni iluarsineqarnissaat sukkatseqinnissaallu utaqqineqartariaqarsimavoq.
- Attaveqaatit kipineranni atuisut attaveeruttoornerup kinguneranik misigisaqqartussaajunnaarlugit, pitsanngorsaaqsinaanersugut misissussavarput, taanna oqarpoq.
Suliniummut tassunga aningaasaliissutit katillugit 1 milliardit koruuninik Tele-post aningaasaliissuteqarpoq. Suliffeqarfik suliniutinut 2017-imiit ukioq mannamut 800 millionit koruuninik aningaasaliissuteqarpoq.
AAMMA ATUARUK Kujataani immap naqqatigut kabelimik iluarsaassineq aqagu aallarteqqinneqartussanngortoq
Tele-Post Immap naqqatigut nutaamik attaveqaasiortigani misissoqqissaarneqaqqaassaaq. Misissiuinissamut sulineq maanna aallartinneqarpoq oktobarillu naanerani naammassinissaa naatsorsuutigineqarpoq.
Tele-Postip nuna tamakkerlugu qarasaasiani sullississutaasut isumannaannerulersiniarpai. Tassa attaveqaatit attaveqarnerlu internettikkut saassunneqarsinnaanermut isumannaannerulersinniarneqassapput.
