Tele-Post suleriaasissamik nutaamik saqqummiisoq
- Siunertaavoq atuisut 92 procentiisa Kalaallit Nunaat tamakkerlugu - Nanortalimmiiit Upernavimmut - Nuummisulli sukkatigisumik atugaqalernissaat, TelePost anguniagassani nutaaq pillugu taama allappoq.
Taamalu anguniagaqarneq innuttaasorpassuit illoqarfiit pingaarnersaata avataaniittut naammagisimaassavaat. Taama anguniagaqarnermi siunertarineqartoq tassaavoq kabelip immap naqqatigoortup Maniitsumut, Sisimiunut Aasiannullu tallineqarnissaa.
Kabelip immap naqqatigoortup tallinerata saniatigut, radiokæde Uummannamiit Upernavimmut tallineqassaaq, Aaasianniillu Qasigiannguanut radiokæde sakkortusarneqassalluni - tassa 2017-ip ingerlanerani tamakku tamarmik suliarineqassapput.
AAMMA ATUARUK Tele-Post Unammilleqatigiinnermut Aqutsisoqarfimmit iluarseeqquneqarpoq
TelePostip kissaatigaa mobilitigut attaveqaatit pitsanngorsaavigineqarnissaat, attaveqaat 4G-mik taaneqartartoq Kalaallit Nunaat tamakkerlugu atorneqarsinnaasunngortillugu.
Kalaallit Nunaanni internetip sakkortusarneqarnerata saniatigut TelePostip kissaatigaa atuisut naammagisimaarinninnerulernissaat, suliffeqarfimmilu sulisut sulinerminnik nuannarinniinnarnissaat.
Suleriaasissaq naapertorlugu 2017-imi sulisut 435-usut 2020-mi 390-iinnanngornissaat. Tamakku saniatigut TelePostip anguniangaraa ukiut sisamat ingerlaneranni Namminersorlutik Oqartussanut iluanaarutinit 378 millioner koruunit akinernissaat.