Tele-Post GE-mi ilaasortaajunnaarnialerpoq

Kalaallit Nunaanni inuussutissarsiortunit, GE-mit, Sulisitsisut Peqatigiiffiannik GA-mik siornatigut taaguuteqarsimasuni ilaasortaajunnaarnissani Tele-Postip eqqarsaatersuutigigaa, Tele Greenlandip paasissutissiisartuata KNR-imut ualeq manna uppernarsarpaa.

Tele, 474-inik sulisulik, GE-mi taamaasilluni ukioq manna juulip aallaqqaataanit atuutilersussamik ilaasortaajunnaarsinnaassaaq.

Suliffeqarfiit Namminersorlutik Oqartussanit pigineqartut arlallit GE-mi ilaasortaajunnaarnissaannik oqartussanit kajumissaarneqarsimasut, tusarfiit inuussutissarsiortuneersut februaarimi oqaatigaat.

Tele-Postip GE-mit ilaasortaajunaarnissamik eqqarsaatersuutai pillugit Tele-Postimi siulersuisut siulittaasuat Agner Mark KNR-ip oqaaseqartinniaraluaramiuk oqaaseqarumanngilaq. Taanna Tele-Postimi pisortaanerugallartumut Steen Montgomery-Andersenimut innersuussivoq, taassumalli oqarasuaat aamma tigujumaneq ajorpaa.

Tele-Postip GE-mit aninissaanut atatillugu politikkikkut piumasaqaatit aallaavigineqanngitsut, aningaasatigulli inissisimaneq aallaaviusoq, Tele Greenlandip paasissutissiinermut pisortaata Ivalo Egedep emailikkut allakkani allaaseraa:

- Assigiinngitsuni ilaasortaaffitsinnik nalilersuinikuunerput uppernarsarsinnaavara, GE-mullu ilaasortaaneq uagutsinnut iluaqutissartaqarnersoq aamma nalilersorsimallutigu, ilaasortaanerput ukiumut akiliutigisartakkatsinnut naapertuunnersoq nalilersorsimallutigu, Ivalo Egede ilaatigut allappoq.

Tele-Post GE-mik suleqateqarsimanermut qujassuteqarsimasoq taassuma ilanngullugu oqaatigaa.