TELE-POST agguagarsisitsinerusalissasoq
82 millionit koruunit piginnittunut agguaanneqarnissaat ataatsimeersuarnermi aalajangerneqarpoq. Ingerlatseqatigiiffilli ukiuni tulliuttuni marlunni agguagarsisitsinerusalissasoq siulersuisut siulittaasuata oqaatigaa. Tassalu 50 millionit koruuninik 2017-imi 2018-imilu agguagarsisitsinerusassaaq. Tassalu Namminersorlutik Oqartussat ukiumut 132 millionit koruuninik agguagarsisassaaq.
Aamma attaveqaatitigut pitsanngorsaasoqartoq, taamaattoqarneratalu malitsigisaanik innuttaasut amerlanerit decembarip aallaqqaataaniit internetimut attaveqarsinnaalissasut, Stine Bossep oqaatigaa.
AAMMA ATUARUK Tele-Post aningaasartuuteqangaatsiassaaq
Attaveqaatit pitsanngorsarneqartut
TELE-POST-ip kitaani attaveqaatinut 800 millionit koruunit missaannik aningaasaliinissaa ingerlatseqatigiiffiup siulersuisuisa siorna aalajangerpaat.
Tassalu immap naqqatigut kabelip Aasiaat tikillugit tallineqarnissaa, sakkortusaavimmillu annertuumik pisinnaasalimmik Aasiannit Ilulissanut attaveqartussamik pilersitsisoqarnissaa aalajangiunneqarpoq.
Aammattaaq sakkortusaaviup Uummannamit Upernavimmut maanna attaveqartup tallineqarnissaa aalajangiunneqarpoq.
Taamaaliornemi nunatsinni innuttaasut 92-procentiisa Nuup internetiata pitsaassusaatuulli 2020-imi interneteqarnissaat siunertarineqarpoq.
Nunap sinnera puiorneqanngitsoq
Aamma Upernaviup avannaaniittut Tunumiittullu qaammataasamit internetimut attaveqarfiusut puiorneqanngitsut oqaatigineqarpoq. Sakkortusaavik Upernavimmut attavilerneqarpat, taava qaammataasat Upernavimmi interneteqartitsisartut illoqarfinnut allanut interneteqartitsisinnaalissapput.
Tamannalu Qaanaami, Ittoqqortoormiini Tasiilamilu innuttaasut iluaqutigissavaat.
